ဆဲချင်လည်း ဆဲ ဆိုချင်လည်း ဆို 🖋 မောင်သာချို + ဆဲတတ်သူများနှင့် တစ်ညနေ 🖋 ဂျူး
ဆဲချင်လည်း ဆဲ ဆိုချင်လည်း ဆို
**************************
မောင်သာချို
(တစ်)
လူတစ်ယောက် စိတ်နေစိတ်ထား ကောင်းမြတ်သည်၊ မကောင်းမြတ်သည်ဟူသော ကိစ္စနှင့်ပတ်သက်၍ သုံးသပ်အကဲဖြတ်ရန် စံနှုန်းသတ်မှတ်ချက် ဟူသည်မှာကား လူတစ်ဦးတစ်ယောက်က ချမှတ်ပေးလိုက်ရုံမျှနှင့် ပြည့်စုံလုံလောက်ကောင်းသည် မဟုတ်ပါ။ ကာလဒေသကို လိုက်၍ ရှုထောင့်အမျိုးမျိုး တန်ဖိုးဖြတ်ချက်အထွေထွေ ရှိကြလေမည်သာ ဖြစ်ပါသည်။
သဒ္ဓါတရား ထက်သန်မှုအပေါ်တွင် အခြေခံ၍၊ ကိုယ်ကျင့်သီလ လုံခြုံမှုအပေါ်တွင် အခြေခံ၍၊ ဉာဏ်ပညာကြီးမားခိုင်ခံ့မှုအပေါ်တွင် အခြေခံ၍၊ အပြောအဆို အနေအထိုင် သပ်ရပ်ရည်မွန်မှုအပေါ်တွင် အခြေခံ၍ စီးပွားဥစ္စာ ဖွံ့ထွားစည်ပင်မှုပေါ်တွင် အခြေခံ၍၊ အခြေခံအကြောင်းတရားတို့ အမျိုးမျိုး ကွဲပြားကြမည်သာ ဖြစ်ပါသည်။
သို့သော် ငြင်းမရနိုင်သော အချက်တစ်ချက်ကတော့ဖြင့် ရှိပါသည်။ ယင်းမှာကား လူတစ်ယောက်သည် သူ၏အတ္တကို မည်မျှအထိ စွန့်ပယ်နိုင်သည်၊ အများအကျိုးကို အများနှင့်အတူ မည်မျှအထိ ပါဝင်ထမ်းရွက်နိုင်သည်ဟူသော အချက်ပင် ဖြစ်ပါသည်။ ထိုအချက်သည် လူတစ်ယောက်၏ စိတ်နေစိတ်ထားကို အကဲဖြတ်ရာ၌ အကောင်းဆုံးစံနှုန်း မဟုတ်သည့်တိုင် ငြင်းပယ်ပစ်လောက်သော စံနှုန်းတစ်ခုတော့ မဟုတ်ဟု ကျွန်တော်က ယူဆမိပါသည်။
ကျွန်တော်တို့သည် ကျွန်တော်တို့၏ ခရီးရှည်ကြီးကို လျှောက်လှမ်းသွားကြရာ၌ တစ်ခါတစ်ရံ ရထားစီးရင်း၊ တစ်ခါတစ်ရံ ကားစီးရင်း၊ တစ်ခါတစ်ရံ ကိုယ့်အလုပ်စားပွဲမှာ ကိုယ်ထိုင်ရင်း၊ တစ်ခါတစ်ရံ ကိုယ့်ရပ်ကွက် ကိုယ့်အိမ် ကိုယ့်အခန်းကလေးထဲမှာ နေထိုင်ရင်း အများနှင့်အတူတကွ မည်မျှပါဝင်နိုင်သည်၊ မပါဝင်နိုင်ဆိုသော အချက်မှာ မြင်သာထင်သာသော ကိစ္စဖြစ်ပါသည်။ ကိုယ့်အထဲက ဘယ်လောက်ဖဲ့ပေးလိုက်နိုင်သည်၊ ဖဲ့မပေးလိုက်နိုင်သည် ဆိုသောအချက်မှာ ထိုသူ၏ စိတ်ဓာတ်အဆင့်အတန်း အခြေအနေ ပြယုဂ်ပင် ဖြစ်ပါသည်။
စာရေးဆရာမ ဂျူး ကမူ ယင်းဝတ္ထုတိုကလေးတစ်ပုဒ်ဖြင့် ဖွဲ့ဆိုတင်ပြသွားခဲ့ဖူးပါသည်။ ဆဲတတ်သူများနှင့် တစ်ညနေ ဟုသောဝတ္ထုတိုကလေးပင် ဖြစ်ပါ၏။ ဖရုဿဝါစာ ကြမ်းတမ်းသောစကားကို ဆိုသူနှင့် ပီယဝါစာ ချစ်ဖွယ်သောစကားကို ဆိုကြသူများ၊ ဘယ်သူတွေ ဘယ်လောက် စွန့်လွှတ်နိုင်ပါလိမ့်။
(နှစ်)
ဂျူး၏ ဆဲတတ်သူများနှင့် တစ်ညနေ ဟူသော ဝတ္ထုတိုကလေး၌ ဇာတ်လမ်းက တကယ့်ကိုမှ ပါးပါးငွေ့ငွေ့ကလေးမျှသာ ပါဝင်ပါသည်။ ဇာတ်ဆောင်တွေကလည်း တစ်ယောက်တလေသော်မှ နာမည်မပါကြ။ သို့သော်လည်း လိုအပ်သည်ဟု ထင်သောကြောင့် ဇာတ်လမ်းကို အကျဉ်းမျှ ပြန်လည်ဖော်ပြလိုပါသည်။
ဝတ္ထုထဲတွင် ပါဝင်သော မိန်းကလေးက မျက်မှောက်ကာလ မိန်းကလေးများလိုပင် ဘောလုံးပွဲကို ကြိုက်သူဖြစ်ပါသည်။ ဥရောပတံခွန်စိုက် ဖလားပွဲများဆိုလျှင် စွဲစွဲမြဲမြဲ ကြည့်တတ်လေ့ရှိသူဖြစ်ပြီး ကြိုက်လွန်းသောကြောင့် ဗွီဒီယိုတိတ်ဖြင့်ပင် ကိုယ်ပိုင်ကူးယူထားတတ်သူ ဖြစ်ပါသည်။ တစ်ခါတစ်ရံ ရုပ်မြင်သံကြားရှေ့၌ ခင်ပွန်းနှင့်အတူ ဘောလုံးပွဲထိုင်ကြည့်ကြရင်း လင်မယားနှစ်ယောက် အပျော်တမ်း လောင်းချင်လောင်းနေတတ်သော မိန်းကလေးဖြစ်ပါသည်။ တစ်ခါ၌ ဂျာမဏီနှင့် ချက်ပွဲကို ကြည့်ကြရာ ဂျာမဏီအသင်း တော်သည်ကို သိပါလျက်နှင့် မိမိခင်ပွန်းသည်ကို အရွဲ့တိုက်ကာ ချက်ဘက်မှ လောင်းခဲ့သော မိန်းကလေးဖြစ်ပါ၏။
တစ်ခုသော ညနေတွင်ကား ထိုလင်မယားနှစ်ယောက်တို့ အောင်ဆန်းကွင်းထဲကို ရောက်သွားကြပါသည်။ ချစ်ကြည်ရေး ခြေစမ်းပွဲတစ်ပွဲကို သွားကြည့်ကြခြင်း ဖြစ်ပါ၏။ ခေတ်အခြေအနေအရ ဘောပွဲကြည့်ပရိသတ်ထဲတွင် မိန်းကလေးအချို့ ပါဝင်သည်မှာ မှန်သော်လည်း အများစုကမူ အမျိုးသားများသာလျှင် ဖြစ်ပါသည်။ အမျိုးသားတို့သည်ကား အမျိုးသားတို့ ထုံးစံအတိုင်း အော်ကြ ဟစ်ကြ ဆဲကြဆိုကြနှင့်။ တစ်ခါတစ်ခါ ပျစ်ပျစ်နှစ်နှစ်ကြီးကိုပင် ဆဲဆိုနေကြခြင်း ဖြစ်ပါသည်။ သည်တော့ ဘောလုံးပွဲ လာကြည့်မိသူ မိန်းကလေးက ထပြန်ချင်လာသည်။ ထိုအခါ ယောက်ျားဖြစ်သူက မကြားချင်ယောင်ဆောင်နေလိုက်ကွာဟု ဆိုကာ တားလာသဖြင့် ဘောလုံးပွဲကို ပြီးသည်အထိ ဆက်ကြည့်နေဖြစ်ခဲ့လိုက်သည်။
ဤသို့ဖြင့် ဘောလုံးပွဲပြီးသွားသောအခါ တစ်ကွင်းလုံး သောသောညံညံ ဆဲဆိုနေကြသူတွေထဲမှနေ၍ အချို့ အချို့တို့ကိုမူ မိန်းကလေးက မှတ်မိလိုက်ပါသည်။ အထူးသဖြင့် သူတို့နှင့် မလှမ်းမကမ်းမှ ယောက်ျား သုံးလေးယောက်ကို မှတ်မိလိုက်သည်။ တစ်ယောက်က ဂျင်းရှပ်အင်္ကျီ ခပ်နွမ်းနွမ်းနှင့်။ အင်္ကျီက ဖြူဖတ်ဖြူရော်။ လက်ခေါက်၍ ဝတ်ထားသည်။ ထိုသူကား ဆံပင်က ခပ်ရှုပ်ရှုပ်။ မျက်လုံးက ပါးပါး။ မျက်တွင်းနက်နက်။ မျက်လုံးတွေက အမြဲတမ်း အရက်သောက်ထားသူတစ်ဦးလို နီနီရဲရဲ။ နောက်တစ်ယောက်ကမူ အကွက်မပေါ်တော့သည့် ပုဆိုးကို ခါးပုံစကြီးကြီးဖြင့် ဝတ်ထားသည်။ အခြားတစ်ယောက်ကမူ ရှပ်အင်္ကျီအနီနှင့်။ မရမ်းရောင်ပုဆိုးနှင့်။ ဤကဲ့သို့ အဆင့်တန်း သိပ်မမြင့်လှသော ဝတ်ပုံစားပုံ နေပုံထိုင်ပုံများနှင့် ရိုင်းစိုင်းစွာ ဆဲဆိုနေသူများကို တွေ့သောအခါ မိန်းကလေးက မိမိခင်ပွန်းသည်ယောက်ျားကိုလည်း ဤသို့များ ဖြစ်နေမလားဟု စိတ်ပူသွားမိသည်။ သို့သော် ခင်ပွန်းသည်က အောက်တန်းကျတဲ့အစားထဲ ကိုယ်မပါဘူးဟု ပြောလာခဲ့ပေရာ
မိန်းကလေး ရင်ပေါ့သွားရသည်။
သို့ဖြင့် ဘောလုံးကွင်းထဲမှ ထွက်လာခဲ့ကြရာ ပထမတော့ တက္ကစီတစ်စီးကို ငှါးစီးဖို့ပဲ ဖြစ်ပါသည်။ သို့သော် ချွေတာတတ်သော မိန်းကလေးက ဘတ်စ်ကားဖြင့် သွားရန် စိတ်ပြောင်းသွားခဲ့ရာမှ အနော်ရထာလမ်းမကြီးပေါ်ကို လင်မယားနှစ်ယောက်တို့ ရောက်လာခဲ့ကြပါသည်။ အောက်ကြည့်မြင်တိုင်ဘက်ကိုသွားမည့် ဘတ်စ်ကားတစ်စီးပေါ်ကို တက်ဖြစ်ခဲ့ကြပြီး နေရာလည်း ရခဲ့ကြပါသည်။ ဘတ်စ်ကားပေါ်တွင်ကား ဘောလုံးပွဲပြန် ပရိတ်သတ်တို့ အများအပြား ပါလာကြပြီး ရှေ့ပိုင်းတွင် မတ်တတ်ရပ်နေသည် လူစုစုထဲ၌ မိန်းကလေး မှတ်မိနေသည့် အဆဲသန်သော လူသုံးလေးဦးကိုလည်း လှမ်းတွေ့လိုက်ကြရပါသည်။ သူတို့ကား ဘတ်စ်ကားပေါ်တွင်လည်း တိုင်းကာထွာကာဖြင့် ဟောင်ဖွာဟောင်ဖွာ ပြောဆိုနေကြဆဲ။
သို့ဖြင့် ဘတ်စ်ကားထွက်ခွာလာခဲ့ရာ လေးငါးမှတ်တိုင်မျှ မောင်းပြီးသောအခါတွင်ကား ရုတ်တရက် ကားစက်သေသွားပါတော့သည်။ ဤတွင် ကားစပယ်ယာက ဝိုင်းတွန်းပေးကြဖို့ ဆော်ဩလာပါ၏။ သူက မုန့်ဟင်းခါးစားလေးဗျို့ဟု ဆိုကာ ခပ်ပျော်ပျော် အကူအညီတောင်းလာခဲ့လေရာ လူတွေကလည်း ခပ်ပေါ့ပေါ့ပါးပါးပင် ဆင်းသွားခဲ့လိုက်ကြပါသည်။ ထူးခြားသည်ကတော့ ထိုသို့ ကားကို ဆင်းတွန်းကြသူ အများစုမှာ မတ်တတ်ရပ်ပြီး စီးလာကြသည့် ဟောင်ဖွာဟောင်ဖွာသမားတွေ ဖြစ်ကြပြီး ထိုင်ခုံတွင် ထိုင်နေကြသူ အများစုတို့ မပါဝင်ကြခြင်းပင်။
အချို့က ကားတွန်းသည့်အလုပ်ဟူသည်မှာ မိမိတို့နှင့် မလျော်ကန်ဟူသော သဘောမျိုးဖြင့် တကယ့်ကို လိပ်ပြာသန့်သန့်နှင့် ထိုင်နေကြခြင်း ဖြစ်ပါသည်။ အချို့ကမူ မိမိတို့ ထိုင်ခုံနေရာကလေး ပျောက်သွားမည်စိုး၍ ဆင်းမတွန်းကြခြင်း ဖြစ်သည်။ အချို့ကမူ မိမိတို့မပါလည်း ကားစက်နိုးသွားမှာပါပဲလေဟူသော သဘောမျိုးဖြင့် နေသာသလို နေနေကြခြင်း ဖြစ်ပါသည်။ အချို့ကမူ ထိုင်ရမလို ထရမလို လိပ်ပြာမလုံသော မသက်မသာ ကိုယ်ဟန်နေထားများနှင့်။ ဘာပဲဖြစ်ဖြစ် ကားကတော့ စက်နိုးသွားခဲ့ပါလေသည်။ သည်တော့လည်း ဘောလုံးကွင်းထဲ၌ ဆဲကြဆိုကြသူတွေ အပါအဝင် ကာတွန်းသူတွေက ပျော်ရွှင်ဖွယ် ညာသံကြီးနှင့်အတူ ကားပေါ်ကို ပြန်တက်လာကြသည်ပဲ ဖြစ်ပါသည်။ ထိုအထဲ၌ ဆဲတတ်သူများကို အထင်သေးခဲ့သော လူရွယ်လင်မယားနှစ်ယောက်တို့ မပါဝင်ကြပါလေ။
(သုံး)
အခြားသူတွေအတွက်ကတော့ဖြင့် ကျွန်တော်မသိ။ ကျွန်တော့်အနေနှင့်ကတော့ ဆဲတတ်သူများနှင့် မကြာခဏဆိုသလိုပင် ကြုံရဆုံရတတ်လေ့ရှိခဲ့သူ ဖြစ်ပါသည်။ ဒါကလည်း ကျွန်တော်က ခရီးအသွားအလာ များပြားလွန်း၍ ဖြစ်လိမ့်မည်ထင်ပါသည်။ တစ်ခါကများဆိုလျှင် ဟင်္သာတ—ဇလွန်သွား ကားလမ်းမပေါ်တွင် ဖြစ်ပါ၏။ ရာသီက မိုးရာသီကြီး ဖြစ်သည်။ လမ်းက ဗွက်ထူသောလမ်း ဖြစ်ပါ၏။ လမ်းက ကားတစ်စီးစာ အနိုင်နိုင် ခင်းထားရသော လမ်းဖြစ်ရာ ကားနှစ်စီး ဆုံပြီဟုဆိုလျှင် ဘယ်ကားကမှ ဘေးကိုချမပေးချင်ကြ။ မတော်တဆ ကားဘီး ရွှံ့ထဲသို့ နစ်သွားပါက လမ်းပေါ်ရောက်အောင် ပြန်အတက်ရခက်၍ ဖြစ်ပါသည်။
ဖြစ်ချင်တော့ ထိုခရီးစဉ်မှာတုန်းက ကျွန်တော်တို့ကားနှင့် ရင်ဆိုင်တွေ့ရသည့်ကားမှာ ကုန်တွေအဆမတန် တင်ထားသည့် ကားကြီးဖြစ်ရာ ခရီးသည်တင်ရုံမျှသာဖြစ်သော ကျွန်တော်တို့၏ မှန်လုံကားက သဘောကောင်းလွန်းစွာဖြင့် လမ်းဘေးကို တော်တော်ကလေး ချပေးလိုက်ခဲ့ပါသည်။ သို့ဖြင့် လမ်းပေါ်ကို ပြန်တက်သောအခါ တက်မရပါလေတော့။ ညာဘက်ဘီးနှစ်ခုစလုံး ရွှံ့ထဲ၌ နစ်ကာ တောက်လျှောက်ကြီး သည်အတိုင်း ပါလာနေသည်။ သည်တော့ လူအားဖြင့် တွန်းတင်ဖို့ ကြိုးစားကြရပါသည်။
ဂျူး၏ ဆဲတတ်သူများနှင့် တစ်ညနေ ထဲကအတိုင်းပင် ဖြစ်ပါသည်။ ကားကို အားကြိုးမာန်တက်နှင့် လမ်းပေါ်အရောက် တွန်းတင်ရန် အသင့်ပြင်နေကြသူများမှာ ကွမ်းယာတပျတ်ပျတ်၊ တံတွေးတပျစ်ပျစ်၊ အရက်နံ့တထောင်းထောင်း၊ ချွေးနံ့အောက်သိုးသိုးနှင့် လူများပင်ဖြစ်ပါသည်။ ကားမှာ ရွှံ့ထဲဗွက်ထဲ၌ တွန်းကြရမည်ဖြစ်ရာ ဖိနပ်ကို ကားပေါ်တွင် ချွတ်ထားသူက ထားခဲ့၊ ခါးတွင် ထိုးသူကထိုးနှင့် ဖြစ်ပါ၏။ လူရည်သန့်ဟု ထင်ရသူ သို့မဟုတ် မိမိကိုယ်မိမိ ထိုအတိုင်း တန်ဖိုးဖြတ်ထားသူများကား ကားပေါ်မှ ဆင်းမလာကြပါ။ အချို့ ဆင်းလာကြသည့်တိုင် ကားနှင့် မလှမ်းမကမ်းမှ မြေကြောမာရာမှာ ရပ်၍နေကြပါသည်။ ကားမှာ တွန်းလည်း တွန်း မောင်းလည်းမောင်း လုပ်သည့်တိုင် လမ်းပေါ်ကို တက်မလာဘဲ တစ်ခြမ်းက လမ်းပေါ်က၊ တစ်ခြမ်းက ရွှံ့ထဲက တရွတ်ဆွဲပြီးသာ သွားနေပါသည်။ သည်တော့ ကားဘီးအောက်ကို ခဲလုံးကြီးတွေ ခုကြ၊ လမ်းဘေးက သစ်ကိုင်းတွေချိုးပြီး ခြုကနှင့်။ ဆဲတတ်သူတွေက ရွှံ့အလူးလူး။ သည်လိုနှင့် တစ်နာရီနီးပါးလောက် ကြာတော့မှပဲ ကားက လမ်းပေါ်ကို ရောက်သွားခဲ့ပါလေသည်။
ကျွန်တော်တို့၏ ပတ်ဝန်းကျင်မှာက သည်အတိုင်းပဲဖြစ်ပါသည်။ မအေနှမ ဆဲကြဆိုကြ၊ တိုင်းကြထွာကြ၊ နောက်ကြပြောင်ကြ၊ စကားတွေအလေဏတော ပြောကြဆိုကြနှင့်။ ဒါပေမဲ့ သည်လူတွေကပဲ ရေချိုးဆိပ်တံတားကို ပြန်မတ်ခဲ့ကြခြင်း ဖြစ်ပါသည်။ သည်လူတွေကပဲ မမွေးနိုင် မဖွားနိုင် ကိုယ်ဝန်အရင့်အမာကြီးကို လှည်းပေါ် လှေပေါ် ပွေ့တင်ခဲ့ကြခြင်း ဖြစ်ပါသည်။ သည်လူတွေကပဲ ရပ်နေသော ကားကို ရှေ့ကို တွန်းနှိုးပေးခဲ့ကြခြင်း ဖြစ်ပါသည်။ သည်လူတွေကပဲ သာမှုနာမှုတွေမှာ မောင်းမထုဘဲ ရောက်လာခဲ့ကြခြင်း ဖြစ်ပါသည်။
သည်တော့လည်း ဆဲချင်လည်း ဆဲ၊ ဆိုချင်လည်း ဆိုကြပါစေပေါ့။ ဝန်ခံရလျှင် ကျွန်တော်က ဆဲလည်း မဆဲခဲ့။ ဆိုလည်း မဆိုခဲ့။ ဟင်္သာတနှင့် ဇလွန်ကြားက ရွှံ့ထဲမှာ ဘီးနစ်နေသည့် ကားကို ဝိုင်းတွန်းရာမှာလည်း ကျွန်တော် မပါခဲ့။ ဂျူး၏ ဝတ္ထုထဲက ထိုင်နေသူတွေလို ခုံနေရာပျောက်သွားမှာ စိုးရိမ်လို့တော့ မဟုတ်။ ကျွန်တော့်ကတ္တီပါဖိနပ်သဲကြိုးကလေးကို ရွှံ့စဉ်သွားမှာ ကြောက်သူသာ ဖြစ်ပါသည်လေ။
ရည်ညွှန်း — ဂျူး၏ ဆဲတတ်သူများနှင့် တစ်ညနေ (ရတနာသစ်မဂ္ဂဇင်း၊ စက်တင်ဘာ၊ ၁၉၉၆)
ဧပြီ ၂၀၀၀
ဆရာမောင်သာချိုရဲ့ 'ကြည်အေးကဗျာ၊ ဂျူးဝတ္ထုနှင့် လင်္ကာရလမ်း' စာအုပ်စာမျက်နှာ ၇၁ - ၇၆ ကနေ ကိုယ်တိုင်စာရိုက်ကူးယူ မျှဝေပါတယ်။
စလေ ငနော့
_________________________
ဆရာမဂျူးရဲ့ 'ဆဲတတ်သူများနှင့် တစ်ညနေ' ဝတ္ထုတိုကိုလည်း ပူးတွဲဖော်ပြပေးလိုက်ပါတယ်။
ဆဲတတ်သူများနှင့် တစ်ညနေ
**********************
ဂျူး
ဆေးလိပ်မီးခိုးငွေ့များ တစ်စတစ်စ ပါးလျားကာ ပျောက်ကွယ်သွားပြီ။ ကွင်းတစ်ခုလုံး သက်ဝင်လှုပ်ရှားနေခဲ့သော ကစားသမားတို့၏ လှုပ်ရှားမှုများသည် ပျောက်ကွယ်သွားပြီ။ အော်ဟစ် ဆဲဆိုသံများဖြင့် ဆူညံနေခဲ့သော ကျွန်မ ပတ်ဝန်းကျင်တွင် လူမရှိတော့သော ထိုင်ခုံလွတ်များသာ ကျန်တော့သည်။ ကစားကွင်း မြက်ခင်းပြင်သည် ယခုတော့ တိတ်ဆိတ်လျက်ရှိ၏။
ထွက်ပေါက်တွင် တရွေ့ရွေ့တိုးထွက်နေကြသော လူအစုအဝေးများ ရှင်းသွားသည်အထိစောင့်ရင်း ကျွန်မတို့နှစ်ယောက် ခုံတန်းများဆီမှ တဖြည်းဖြည်း ဆင်းလာခဲ့ကြသည်။ ဘောလုံးပွဲပြီးသွားသော်လည်း ကျွန်မစိတ်ထဲတွင် လွတ်လပ်ပေါ့ပါးမသွားပါ။ ကျွန်မ မျှော်လင့်သည့် ကစားကွက်မျိုးကို မမြင်တွေ့ရ၍ပဲလား။ ကျွန်မအာရုံတွင် ယခုတိုင် စွဲထင်လျက် ကျန်ရစ်နေသော ဥရောပတံခွန်စိုက်ပွဲ၏ ဘောလုံးကစားဟန်များကြောင့်ပဲလား။ ဤခြေစမ်းပွဲကို ကျွန်မ အားမရပါ။ ဘောလုံးပွဲကြည့်နေရသည်ဟုလည်း မခံစားရပါ။
သည်ကြားထဲတွင် ကံဆိုးဝါးစွာ ကျွန်မတို့အနီးမှ လူတချို့က ဘောလုံးသမားများကို ပျစ်ပျစ်နှစ်နှစ် အော်ဆဲနေသောကြောင့် ကျွန်မစိတ်ပျက်နေခဲ့ရသည်။
“သိပ်မိုက်ရိုင်းတာပဲ”
လွှတ်ကနဲ ရေရွတ်ရှုတ်ချမိတော့ မောင်က ကျွန်မ လက်ဖဝါးကို သတိပေးသလို ဆုပ်ညှစ်၏။ ကျွန်မတိတ်ဆိတ်စွာ မျိုသိပ်သည်းသည်းခံ၍ ဆက်လက် ကြည့်ရှုခဲ့ရသည်။ သို့သော် နောက်ထပ် မိနစ်နှစ်ဆယ်ကြာတော့ ကျွန်မအနားက လူတွေ အော်ဟစ်ဆဲရေးကြပြန်သည်။ ကျွန်မ… ရုတ်တရက် ထပြန်ရန်ပင် စိတ်ကူးမိပြီး မောင့်ကို တိုင်ပင်မိသည်။ မောင်က မပြန်ချင်ခဲ့ပါ။
“ဆဲချင်သလောက် ဆဲပါစေကွာ။ မကြားချင်ယောင်ဆောင်နေလိုက်ပေါ့။ သူတို့ ဘယ်တုန်းကတည်းက ဆဲချင်နေမှန်းမှ မသိတာ။ ယောက်ျားတော်တော်များများက ဒီလိုပဲကွ။ ဘောလုံးပွဲမှာ လာလာဆဲကြတာပဲ”
အဲသည် ယောက်ျားအမျိုးအစားထဲမှာ မောင်ပါနေသလားဟု ကျွန်မ မယုံသင်္ကာမေးမိတော့ မောင် မျက်မှောင်ကြုတ်၍ ငြင်းခဲ့သည်။
“ကြံကြီးစည်ရာကွာ။ ကိုယ်ဘယ်တုန်းက ဆဲတတ်ဖူးလို့လဲ။ အဲဒီလို အောက်တန်းကျတဲ့အစားထဲ ကိုယ်မပါဘူး”
သူ့ကိုယ်သူ ဂုဏ်တင်လိုစိတ်ဖြင့် ကာကွယ်လိုက်သော စကားသည် အခြားလူအမျိုးအစားကို စော်ကားလိုက်သလိုဖြစ်သည်ဟု မောင်တွက်ဆဟန်မတူပါ။ မောင့်စကားကို သူတို့ကြားပြီးရန်ဖြစ်မှာ၊ ထိုးကြိတ်မှာ စိုးရိမ်သွားသောကြောင့် ကျွန်မ ချက်ချင်း တိတ်ဆိတ်သွားရသည်။ သို့သော် ထိုအုပ်စုသည် ကျွန်မတို့၏ စကားကြိတ်ကြိတ် တီးတိုးသံကို ကြားဟန်မတူပါ။ ကျွန်မမှာ ကြည့်နေရသည့် ကစားပွဲကို အားမလိုအားမရ စိတ်ပျက်သည်က တစ်ပိုင်း၊ ဘေးနားက မိုက်ရိုင်းနေသော လူများ၏ အော်ဟစ်ဆဲဆိုသံကို တုန်လှုပ်စွာ စိတ်ညစ်နေရသည်က တစ်ပိုင်းမို့ ပွဲမြန်မြန်ပြီးပါစေဟု ဆုတောင်းနေခဲ့သည်။
ကမ္ဘာမှာ ဒုတိယ အဆဲရေးအခံရဆုံးသော ပုဂ္ဂိုလ်အမျိုးအစားမှာ ဘောလုံးသမားများ ဖြစ်ဟန်တူ၏။ ယခုတော့ ပွဲပြီးသွားပေပြီ။ ကျွန်မလည်း စိတ်ချမ်းသာသွားရပြီ။ ကစားကွင်းဂိတ်ပေါက်ဝမှ တိုးထွက်ရင်း နောက်တစ်ခါတော့ လာမကြည့်တော့ပါဘူးဟု ဆုံးဖြတ်လိုက်သည်။
“ဒီပုံစံမျိုးနဲ့ကတော့ကွာ။ ထိုင်းမပြောနဲ့၊ မော်လဒိုက်ကိုတောင် ယှဉ်နိုင်မှာ မဟုတ်ဘူး … မှပဲ”
ကျွန်မ ဘေးနားမှ ကျယ်လောင်သော ဝေဖန်သံ ထွက်လာ၏။ ကျွန်မလှည့်ကြည့်လိုက်သည့်အခါ မှတ်မိနေသော မျက်နှာတစ်ခုကို မြင်ရသည်။ သူပဲ သူတို့ပါပဲ။ ကျွန်မ နားညည်းလောက်အောင် ဆဲရေး အော်ဟစ်နေခဲ့ကြတာ။
ဖြူဖပ် ဖြူရော် ဂျင်းရှပ်အင်္ကျီ ခပ်နွမ်းနွမ်းကို လက်ခေါက်တင်လျက် မသေမသပ် ဝတ်ဆင်ထားပြီး ဆံပင်က ခပ်ရှုပ်ရှုပ်၊ မျက်ခုံးပါးပါး၊ မျက်လုံးက ဟိုးချိုင့်ထဲမှာ။ အရက်သောက်နေကျ မျက်လုံးလိုပင်၊ သွေးကြောများနီနေသည့် မျက်လုံး။ ထိုမျက်လုံးဖြင့် ကျွန်မအား ဖျတ်ကနဲ လှည့်ကြည့်တော့ ကျွန်မ မောင့်အနီးသို့ တိုးကပ်သွားမိသည်။
“မိန်းမတွေလည်း ဘောလုံးပွဲကြည့်လာပြီကွ… နော်”
ကျွန်မကိုပဲ စောင်းမြောင်းလိုသလား၊ တကယ်ပဲ အံ့သြစွာ မှတ်ချက်ချလေသလား မသိပါ။ ဘေးက သူ့အုပ်စုဝင် လူသုံးယောက်က ထိုကိစ္စကို တစ်ယောက်တစ်မျိုး ဆူညံစွာ ဝေဖန်ချက်ပေးနေသည်ကို ကြားရသည်။ တစ်ယောက်က အကွက်မပေါ်တော့သော ပုဆိုးကို ခါးပုံစ ကြီးကြီး ထုတ်ဝတ်ထား၏။ တစ်ယောက်ကတော့ ဘယ်လိုမှ မလိုက်ဖက်သည့် အနီရောင်ရှပ်အင်္ကျီနှင့်၊ ခရမ်းရောင်ပုဆိုးနှင့်။ ဘယ်လိုလူတွေဘာလိမ့်။ သူ့ရုပ်ကိုကြည့်တော့ နည်းနည်းမျှ သနားကမားမရှိ။ မျက်နှာခပ်ချောင်ချောင်၊ လည်ပင်းမှာ စက်ဆီချေးလား၊ အိုးမည်းလား ခပ်မည်းမည်းအရာ စွန်းထင်းပေကျံနေသေးသည်။ တစ်ယောက်ကတော့ တခြားလူတွေလို အလုပ်ကြမ်းသမား ဟုတ်ပုံမရ။ သေသေသပ်သပ်။
“မောင် … နောက်တစ်ခါ ကျွန်မ လိုက်မကြည့်တော့ဘူး”
“ကောင်းပါလေ့ဗျာ။ ဒီစကားကြားချင်နေတာကြာပြီ”
ကျွန်မယောက်ျားသည် မိန်းမနှင့် ယောက်ျား ဘယ်နေရာမှ အဆင့်အတန်း မတူညီနိုင်ဟူသည့် အယူအဆကို တစ်သက်လုံး စွဲကိုင်လာသူဖြစ်၏။ ကျွန်မ တစ်စတစ်စ ဘောလုံးဝါသနာပါလာသည်ကို သူများယောက်ျားတွေလို မုဒိတာမပွားနိုင်သူ၊ အားမပေးလိုသူဖြစ်၏။ ဘောလုံးပွဲကြည့်နေတုန်း ကျွန်မက မေးခွန်းတွေမေးလျှင် စိတ်မရှည်တတ်သူ ဖြစ်၏။ ကျွန်မက မိန်းမပီပီ တစ်ခါတစ်ခါ ဒိုင်လူကြီးပေးသည့် ပြစ်ဒဏ်များကို နားမလည်လိုက်သည့် အခါမျိုးရှိသည်။ မောင်က နေဦးကွာ၊ ပြီးမှ ရှင်းပြမယ်ဟု တိုတိုပြတ်ပြတ် ပြောတတ်သည်။
“မိန်းမဆိုတာ မိန်းမနေရာမှာပဲနေကွာ၊ အဆင့်ကျော်ကျော်မလာနဲ့”
ဤစကားဖြင့် မကြာခဏ နှိမ်တတ်သူလည်း ဖြစ်သည်။ ကျွန်မကလည်း၊ မောင့်ကို မခံချင်စိတ်နှင့် မောင်နှင့်အတူ ဘောလုံးပွဲ အစီအစဉ်များကို ယှဉ်ပြိုင်၍ စောင့်ကြည့်ဖြစ်လေသည်။ မောင့်ထက်ပို၍ ကဲကာ ကျွန်မက ဥရောပဖလားဘောလုံးပွဲ ဆီမီ်းဖိုင်နယ်နှင့် ဖိုင်နယ်ပွဲစဉ်များကို ဗွီဒီယိုခွေ ကူးယူထားလိုက်သေးသည်။ ဂျာမဏီအသင်းတော်မှန်းသိသော်လည်း မောင့်ကို အမြင်ကတ်သဖြင့် ချက်အသင်းဘက်မှ အားပေးလိုက်သည်။ အချိန်ပိုကစားပွဲ၌ ချက်အသင်းဂိုးပေးလိုက်ရသောအခါ ဂိုးသမားလေး ကူဘားကိုသနား၍ မဆုံးတော့ပေ။
“ကိုယ်တို့ တက္ကစီနဲ့ ပြန်ကြမလား”
ကျွန်မတို့ ကစားကွင်းအပြင်ဘက် ရောက်သောအခါ အနည်းငယ် မိုးချုပ်နေပြီ။ ကောင်းကင်သည် အမှောင်သန်းဖို့ စတင်လာပြီ။ ငှက်တစ်အုပ် ဘူတာကြီးဘက်မှ ပျံသန်းလာသည်ကို မြင်ရသည်။ ပတ်ဝန်းကျင်သည် လှုပ်လှုပ်ရွ ရွဖြစ်နေဆဲ။ အိမ်အပြန် အလျင်လိုသူများဖြင့် လမ်းမသည် ရှုပ်ထွေးနေသည်။ ကျွန်မတို့ရှေ့တွင် ကိုယ်ပိုင်ကားများ၊အငှားကားများ၊ ဘတ်စ်ကားများ လျင်မြန်စွာ ဖြတ်သွားနေကြ၏။
“ဟင့်အင်း … ဘတ်စ်ကားနဲ့ပဲ ပြန်မယ်”
သည်အချိန်ဆိုလျှင် အောင်ဆန်းကွင်းမှ ကြည့်မြင်တိုင်သို့ အငှားကားမှာ အနည်းဆုံး တစ်ရာ့ငါးဆယ်မှ တစ်ရာ့ရှစ်ဆယ်အထိ ရှိတတ်သည်။ ကျွန်မ၏ ခြိုးခြံချွေတာစိတ်ကို မောင်က သဘောတူလိုက်သဖြင့် ကျွန်မတို့သည် အနော်ရထာလမ်းအထိ ဆင်းကာ ဘတ်စ်ကား စောင့်ကြရပါသည်။ မကြာမီပင် ကျွန်မ၏ နှမြောစိတ်ကို ကျွန်မကိုယ်တိုင်ပြန်လည် ဒေါသထွက်မိတော့သည်။ မ်ိုက်ရိုင်းလှသည်ဟု ကျွန်မ မှတ်ချက်ချထားသော ဆဲရေးသည့် လူအုပ်စုသည် ကျွန်မတိ်ု့နှင့် အတူပင် ကားစောင့်နေပြီး ကျွန်မတို့တက်သည့် ၄၃ ဘတ်စ်ကားကြီးပေါ်သို့ လိုက်တက်လာလေတော့သည်။ ကျွန်မတို့က ဤကြားကားဖြင့် မကြာခဏပြန်ဖူးသည်မို့ ၄၃ ကားကြီးတွေလာသည်ကို မြင်မြင်ချင်း လိုက်ပါရန် ဆုံးဖြတ်ပြီး ချက်ချင်းတက်လိုက်သောကြောင့် ထိုင်ခုံနေရာရပါသည်။ ထိုအုပ်စုကတော့ အချင်းချင်း ကျွက်ကျွက်ညံအောင် စကားပြောနေကြပြီး ကားစပယ်ယာက အဝေးပြေး အဝေးပြေး အောက်လမ်းဟု ထပ်ခါထပ်ခါအော်မှ လိုက်တက်လာသည် ဖြစ်သောကြောင့် နေရာမရပါ။
သူတို့အုပ်စုက မောင့်ဘေးမှာကပ်၍ ရပ်နေကြသည်။ ကျွန်မက မောင်သိအောင် တီးတိုးစကားဖြင့်
“တွေ့လား။ တွေ့လား ကွင်းထဲကလူတွေလေ”
ဟု သတိပေးမိ၏။ မောင်က မျက်နှာထိ မျက်နှာထားဖြင့် ကျွန်မကိုကြည့်လိုက်တော့မှ ရုတ်တရက် မျက်နှာလွှဲပစ်လိုက်ရသည်။
ကားရပ်ထားပြီး လူစောင့်နေစဉ်မှာ သူတို့အုပ်စုသည် အသံကျယ်ကျယ်နှင့် စကားပြောလိုက်။ တစ်ယောက်ကို တစ်ယောက်တွန်းထိုးပုတ်ခတ်လိုက်၊ ရယ်မောလိုက်ဖြင့် ကားတစ်စီးလုံး သူတို့အသံချည်း ဖြစ်သည်။
“လူချတယ်ဆိုတာ နာမည်သာဆိုးတာ၊ သိပ်အရသာရှိမှာကွ”
“ဒိုင်လူကြီး ညစ်ရင်တော့ လူချပစ်မှကွ၊ ဒါမှ မှတ်မှာ။ ဇင်းမယ်ပွဲတုန်းက ကြည့်ပါလား၊ ဘယ်လောက်ညစ်လဲ”
“အားကစားစိတ်ဓာတ်ဆိုတာ နှစ်ဖက်လုံးညီမှ ကောင်းတာပါကွ၊ ဟိုဘက်က ညစ်ရင်တော့ ဘာအားကစား စိတ်ဓာတ်မှထားမနေနိုင်ဘူး၊ တွယ်သာတွယ် ”
ဘုရား..ဘုရား ။ ကျွန်မ၏ ဝဋ်ကြွေးသည် တစ်လမ်းလုံး တောက်လျောက် လိုက်ပါလာတော့မှာ ထင်ပါရဲ့။ သူတို့ကိုယ်ကလည်း ချွေးစော်ဖြင့် အောက်သိုးသိုးအနံ့ နံနေသည်ဟု ထင်ရသည်။ အခုနေများ အငှားကားလေးနှင့် အိမ်ပြန်လိုက်ရလျှင် ဘယ်လောက် လွတ်လပ်လိုက်မလဲ။ သို့သော် ထိုင်ခုံနေရာလေးကိုလည်း နှမြောနေပြန်ပြီး ငွေ ၁၅ဝ၊ ၂ဝဝ ကိုလည်း နှမြောနေပြန်သည်။
အို ဘာပဲဖြစ်ဖြစ်ပေါ့၊ ခဏပါပဲ။ ပြီးရင် ကိုယ့်လမ်းကိုယ်သွားကြမှာ။ ကံကောင်းထောက်မစွာ လူမပြည့်တပြည့်အချိန်မှာပင် ကားစတင်စက်နိုးကာ ထွက်ခွာလေသည်။
အနော်ရထာလမ်းပေါ်မှာ ရန်ကုန်တစ်မြို့လုံးကလူတွေ လမ်းလျှောက်နေသလိုပင် ရှုပ်ထွေးများပြားလှသည်။ ဈေးသည်များ၏ အော်ဟစ်သံများမှာလည်း ဆူညံနေ၏။ ကားသည် တဖြည်းဖြည်း ပို၍ ပို၍ မြန်လာသောအခါ အသံဗလံများသည် ခပ်လှမ်းလှမ်းမှာ ကျန်ရစ်ခဲ့သည်။ ကျွန်မတို့ကားထဲမှ စကားသံများသာ ကျန်တော့သည်။ ကျွန်မ သက်ပြင်း တစ်ချက်ရှိုက်လိုက်တော့ မောင်က လှည့်ကြည့်၏။ ကျွန်မ စိတ်ကျဉ်းကြပ်နေခဲ့သည်ကို ရိပ်မိဟန်ဖြင့် ကျွန်မကို ပြုံးပြသည်။ မှတ်တိုင်လေးငါးခု အလွန်မှာတော့ မမျှော်လင့်ဘဲ ဘတ်စ်ကားကြီး ထိုးရပ်သွားလေသည်။ ပထမတော့ ကျွန်မမှာ လူစောင့်သည်ဟု ထင်နေသည်။ သို့သော် စပယ်ယာက တဆိတ်လောက်ဗျို့၊ မုန့်ဟင်းခါးလေး စားလိုက်ကြရအောင်ဟု ဟာသဖြင့် အသိပေးတော့မှ ကားပျက်မှန်း သိရတော့သည်။ ကျွန်မ တော်တော့်ကို စိတ်ညစ်သွားပါသည်။ လူတွေ ဆင်းတွန်းလို့ကော ကားပြန်စက်နိုးလာပါ့မလား။ စက်မနိုးရင် ဘယ်နှယ့်လုပ်မလဲ။ နောက်ထပ် ကားတစ်စီး စောင့်ဖို့က မလွယ်ပါ။
“ကဲ ကဲ ဆင်းတွန်းကြရအောင်ဟေ့”
ကျွန်မတို့အနားမှာ မတ်တပ်ရပ်နေသော အုပ်စုက ခပ်ဟားဟားရယ်မောလျှက် ဆင်းသွား၏။ ဟုတ်တာပေါ့။ တွန်းကြည့်ရမှာပေါ့။ ကံကောင်းလျှင်လည်း စက်နိုးလာမှာပေါ့။ လူတစ်ချို့ ထပ်ဆင်းသွားကြသည်။ သို့သော် ထိုင်ခုံတွေမှာတော့ လူအပြည့် ကျန်နေဆဲ၊၊
“မောင် … မဆင်းဘူးလား”
ကျွန်မ မောင့်ကို ခပ်တိုးတိုးမေးတော့ မောင်ခေါင်းရမ်းပြ၏။
“တွန်းမယ့်သူတွေ အများကြီးပါကွာ”
ကျွန်မ မျက်နှာ နွေးခနဲ ပူသွားပါသည်။
“ဒါပေမယ့် … မတွန်းရင်တောင် ဆင်းပေးမှ ကောင်းမှာပေါ့မောင်ရဲ့။ တွန်းရမယ့်လူတွေ အားနာစရာ”
ခပ်ကြိတ်ကြိတ် အပြစ်တင်မိသောအခါ မောင်၏ ဒေါသမျက်လုံးအကြည့်ကို ကျွန်မ ရလေသည်။ ကျွန်မမျက်နှာ လွှဲလိုက်ရသည်။
ကားအနောက်ဘက်သို့ ပြတင်းမှ ခေါင်းပြူကြည့်လိုက်တော့ နောက်ဘက်မှ လူတချို့က တွန်းနေကြပြီ။ ကျွန်မ ထိုင်နေရတာ လိပ်ပြာမသန့်စွာ ခံစားရသည်။ ကျွန်မ ဆင်းသွားလိုက်ရမလားဟု စဉ်းစားသေး၏။ ကားပေါ်က ဆင်းသည့်အုပ်စုတွင် မိန်းမတစ်ယောက်မှ မပါသောကြောင့် ကျွန်မဆင်းသွားလျှင် လူရယ်မောစရာ ဖြစ်လေမလားဟု စိုးရိမ်မိသည်။ လူရယ်သည် မရယ်သည်က နောက်ထား၊ မောင်နှင့် ကျွန်မ အရင်ရန်ဖြစ်ရမှာ သေချာသည်။ ကျွန်မ ကားတွင်းမှာ ဟိုဟိုသည်သည် အကဲခတ်ကြည့်မိ၏။ ထိုင်ခုံတွင် ထိုင်နေကြသူများတွင် ယောက်ျားတော်တော်များများ ပါသည်။ အမျိုးသမီး နှစ်ယောက် သုံးယောက်ပါ၏။ ထိုယောက်ျားများသည် အခြားသူတွေ အောက်ဆင်းပြီး ကားတွန်းနေချိန်တွင် ထိုင်ခုံမှာ ဟန်မပျက် ထိုင်နေနိုင်လေသည်ဟု ကျွန်မအံ့သြမိ၏။ သို့သော်… ဟန်မပျက်တော့ မဟုတ်ပါ။ တချို့မှာ ဟန်ပျက်နေ၏။ ဟိုဘက် လှည့်ရမလို၊ သည်ဘက် လှည့်ရမလို၊ ခေါင်းတစောင်းစောင်းဖြင့် မသက်မသာ ထိုင်နေသူများလည်း ပါဝင်သည်။ သူတို့ ကျွန်မလိုပင် လိပ်ပြာမလုံတာ သေချာ၏။ သို့သော် ထဆင်းပြီး တွန်းပေးဖို့အထိ စိတ်ကောင်းရှိဟန်မတူပေ။ တချို့ကတော့ ဤကိစ္စသည် မိမိနှင့်မဆိုင်သလို အမူအရာမျိုးပင် ရှိသည်။ လိပ်ပြာသန့်သန့်ပင် ဆက်ထိုင်နေလေသည်။ ဆင်တွန်းရသည့် လူတွေမှာပဲ ကားပျက်သည့်အတွက် တာဝန်ရှိနေသလိုလို၊ မိမိတို့မှာတော့ ဘာတာဝန်မှ မရှိသလို။ ကြည့်စမ်း၊ ယောက်ျားတွေ ဖြစ်ပြီးနေနိုင်လိုက်တာ။
မောင့်မျက်နှာထားကို အကဲခတ်မိသောအခါ ကျွန်မပို၍ပင် အံ့သြသွားရသည်။
မောင်သည်လည်း ဟန်မပျက် နေနိုင်ပါလား။ မောင်က ကျွန်မမျက်လုံးအမူအရာကို ရိပ်မိဟန်ရှိသည်။
“မင်းက ဘာဖြစ်နေရတာလဲ”
ဟု ခပ်ငေါက်ငေါက် မေးလေသည်။
“ကားကြီးက အကြီးကြီး မောင်ရဲ့။ ဟိုမှာ လူတွေ တွန်းနေရပြီ”
“တယ်… ဒီမ်ိန်းမ”
ကားသည် တဖြည်းဖြည်း လှုပ်လာပြီးနောက် ရှေသို့ တရွေ့ရွေ့ တိုးသွားသည်။ ကားရှေ့ပိုင်းမှာ ယောက်ျားတချို့သည် ဘက်မလှည့်ဘဲ ကားရှေ့သို့ မျက်နှာလွှဲကာ စုပြုံရပ်နေကြသည်ကိုလည်း ကျွန်မသတိထားမိသည်။ လူတွေဟာ မညီမျှကြဘူးဟု ကျွန်မ တွေးမိသော်လည်း ထိုမညီမျှသည့် လူအတန်းအစားထဲမှာ ကျွန်မလည်း ပါနေပါသည်။ အို ဘာဆိုင်လဲ။ ကျွန်မက မိန်းမ။ မိန်းမတစ်ယောက်ဟာ ယောက်ျားတွေနဲ့အတူ ကားဆင်းတွန်းဖို့ ဘယ်လိုမှ မဖြစ်နိုင်ဘူး။ ထိုခဏ၌ ကျွန်မ၏ ဆင်ခြေကို ကျွန်မပြန်၍ ရယ်ချင်သွား၏။ ဘာလဲ နေရာတကာမှာ မိန်းမဟာ ယောက်ျားနဲ့ တန်းတူအခွင့်အရေး ရသင့်တယ်ဟု တောင်းဆိုလာခဲ့သည့် မ်ိန်းမ၊ အခုသည်အခါမျိုးမှာတော့ ဘာလို့ အခွင့်အရေးတူမယူပြန်သလဲ။ ဘာဖြစ်လို့ အားနွဲ့သည့် မိန်းမသားအဖြစ် ပေကပ်နေခဲ့ပါသလဲ။ ကျွန်မဆင်းသွားလိုက်လျှင် ဘာဖြစ်သွားမှာမို့လို့လဲ။ ထိုခဏ၌ ကျွန်မ၏ ဦးခေါင်းထက်တွင် တစ်ခုခုက ဖိနှိပ်ထားသလို လေးလံလာ၏။ ကျွန်မ ကိုယ်ခန္ဓာမှာလည်း မလုံမလဲစိတ်ဖြင့် တောင့်တောင့်ကြီး ဖြစ်လာသည်။
ညာသံပေး၍ တွန်းနေကြသည့် အသံများနှင့်အတူ ကားက တအိအိ လှုပ်လာ
ပြီးရှေ့သို့ တိုးတိုးသွားချိန်မှာ ကျွန်မကိုယ်ခန္ဓာသည် ကားကြီးတစ်ခုလုံးကို ထမ်းပိုးထားရသလို လေးလံလာသည်။ ကျွန်မ ဘယ်လိုမှ မနေသာတော့သဖြင့် ရုတ်တရက် မတ်တပ်ရပ်လိုက်မိသည်။ မောင်က ဗြုန်းကနဲ မော့ကြည့်ပါသည်။
“ဘာလုပ်မလို့တုန်း”
“ဆင်းမလို့”
“ဟာ မင်းရူးနေသလား၊ ဒါမင်းအလုပ်မဟုတ်ဘဲ။ ရပြီးသားနေရာလေး ပျောက်သွားဦးမယ်”
ထိုခဏမှာ ကျွန်မသည်လေထဲမှာ ကိုယ်ခန္ဓာတစ်ခုလုံး လွင့်ပျံ ပျောက်ကွယ်သွားပါစေဟု တမ်းတမိသည်။ ကျွန်မဘဝမှာ မောင့်အတွက် တစ်ခါမှ ဒီလောက် မရှက်ရဖူးဘူးဟု ထင်ပါသည်။ လက်စသတ်တော့ ကားပေါ်က မဆင်းတာဟာ နေရာပျောက်မှာ စိုးလို့လေ။
ဘုရား… ဘုရား ဒီလောက် ခရီးတိုအချိန်တိုကလေးမှာတောင် မောင်ဟာ နေရာကို တပ်မက်နေခဲ့တယ်ပေါ့။ မောင်၏ ဒေါသတကြီး ဆွဲချထိုင်ခိုင်းမှုကြောင့်လား၊ ကျွန်မ ကိုယ်ခန္ဓာကပဲ အင်အားတွေ ကုန်ခန်းသွားလို့လားမသိပါ။
ကျွန်မထိုင်ခုံပေါ်သို့ ထိုင်လျက်ကျသွားပါသည်။ ထိုအချိန်မှာပင် ကားစက်သံ ပြန်ထွက်ပေါ်ထွက်လာပြီး ဟေးကနဲပျော်ရွင်စွာ အော်ဟစ်သံများ ကြားရသည်။ ထို့နောက် သူတို့အားလုံး ကားပေါ်သို့ ကသောကမျှော ပြန်တက်လာကြသည်။ ဘောလုံးပွဲတွင် ဆဲရေးတိုင်းထွာသည့် လူအုပ်စုက ကားရှေ့တံခါးပေါက်မှ တက်လာကြသည်ဖြစ်၍ ရှေ့ပိုင်းမှာပင် ရပ်နေကြပါသည်။
ကျွန်မနှင့် မျက်နှာချင်းဆိုင်ဖြစ်နေသော ထိုအုပ်စုသည် စောစောကလိုပင် စနောက် ရယ်မောလျက်ရှိသည်။ သူတို့ ဆင်းတွန်းချိန်တွင် ထိုင်ကျန်ရစ်ခဲ့သည့် လူစုရှိနေပါလားဟု ဒေါသဖြစ်မည့်ဟန်လည်း မရှိ၊ ဒေါသဖြစ်ခဲ့လျှင်လည်း ကားတွန်းတုန်းက ဆဲရေးတိုင်းထွာခဲ့ရောပေါ့။ ဒေါသတွေ ကုန်ခဲ့ရောပေါ့။ သည်လိုဆိုပြန်တော့လဲ ဆဲရေးသည့်နည်းက အကောင်းသားပါလား။ ကားသည်စက်သံမှန်လာပြီး နေရာမှ ထွက်ခွာလေသည်။ သူတို့က ကားဆင်းတွန်းပြီး ကျွန်မတို့က ဘာဖြစ်လို့ အေးအေးဆေးဆေး ထိုင်ကျန်ရစ်ရသလဲ။ လမ်းတစ်လျှောက်လုံး ကျွန်မမျက်နှာပူစွာ ခပ်ရှက်ရှက် ဖြစ်နေ၏။
တစ်ခုသေချာသည်ကတော့ ကားဆင်းတွန်းကြသူအားလုံးသည် မတ်တပ်ရပ်စီးကြသူများသာ ဖြစ်ကြသည်။ သူတို့အတွက် ကားပေါ်က ဆင်းရခြင်းဟူသည့်အဖြစ်သည် မထူးဆန်းပေ။ နဂိုကတည်းက နေရာမရခဲ့သောကြောင့် ဖြစ်သည်။ ဒါပေမယ့် သည်ကားကြီး ပျက်ယွင်းမှုအတွက် သူတို့သာ တာဝန်ရှိသည်မဟုတ်ပဲ။
ထိုင်နေသူများတွင်လည်း တာဝန်ရှိသည်ဟူသောအသိ သူတို့ထဲမှာမရှိဘူးလား။ ရှိတော့ရှိမှာပါ။
သို့သော် သိပ်တွက်ကပ်နေ၍ အကြောင်းမထူးဘူးဟု မြင်သွားလို့လား။ သို့မဟုတ် ငါတို့ တတ်နိုင်သလောက်တော့ လုပ်ပေးပါ့မယ်လေဟူသော စေတနာကြောင့်ပဲလား၊ သို့မဟုတ် မတ်တပ်ရပ်စီးနေသည့် လူတန်းစားကသာ ကားတွန်းရန် ပို၍ သင့်တော်ပါသည်ဟု ကျိုးနွံစွာ အကျင့်ပါနေလို့ပဲလား။ ဘာပဲဖြစ်ဖြစ် ကျွန်မ နှာခေါင်းရှုံ့အပြစ်တင်ခဲ့သောအုပ်စုက ပေါ့ပါးသွက်လက်စွာ ဆင်း၍ ကားတွန်းခဲ့သည့် အဖြစ်အပျက်ကြောင့် ကျွန်မ ပို၍ပင် မလုံမလဲဖြစ်ရပါသည်။ ထိုအခါ ကျွန်မတို့ ထိုင်ကျန်သူများဘက်မှ ဆင်ခြေတစ်ခုခုကို ရှာတွေ့ရန် ကျွန်မ အပြင်းအထန် ကြိုးစားယူမိသည်။
ယောက်ျားကြီးကြီးတွေ ယောက်ျားငယ်ငယ်တွေ (ကျွန်မတို့  မိန်းမတွေအပါအဝင်) ထိုင်နေသူအားလုံး ဘာကြောင့် ဆင်းမတွန်းကြသလဲ။ တာဝန်သိစိတ် မရှိလို့တော့ မဟုတ်နိုင်ပါဘူးနော်။ ချောင်ခိုချင်စိတ်ကြောင့်တော့လည်း မဟုတ်နိုင်ပါဘူးထင်ရဲ့။ ကိုယ်မလုပ်လျှင်လည်း လုပ်မည့်သူရှိနေကြောင်းကို သိနေလို့ပဲ ဖြစ်မည်။ ထိုသို့ တွေးယူလိုက်သောအခါ ကျွန်မနေရထိုင်ရတာ နည်းနည်းသက်သာ သွားသလိုရှိ၏။ တော်ပါသေးရဲ့။ ငါ့နှယ်စောစောတုန်းကသာ ဒီအတွေးမျိုး တွေးလိုက်ပါတော့လား။ သည်လိုသာဆိုလျှင် ကျွန်မ မောင်နှင့် ရန်ဖြစ်ခံပြီး ထိုင်ရာမှထရပ်မိမည် မဟုတ်ပေ။ ကျွန်မ မျက်စိအကြည့်က ရှေ့အုပ်စုထံ ရောက်သွားပြန်၏။ သည်တစ်ခါတော့ ရှပ်အင်္ကျီအနီရောင် ဝတ်ထားသည့် လူနှင့် ကျွန်မ အကြည့်ချင်းဆုံသွားသည်။ သူ ကျွန်မကို တော်တော်ကြာကြာအောင် ကြည့်နေလေသည်။ ဘယ်လိုအကြည့်ပါလိမ့်။ ဘောလုံးပွဲမှာ တွေ့ခဲ့သည့်မိန်းမဟု မှတ်မိသည့်အကြည့်လား။ မိန်းမတွေလည်း ဘောလုံးပွဲလာကြည့်တာကိုး ဟူသည့် အသိအမှတ်ပြုသည့် အကြည့်လား။ မဟုတ်ပါ။ သည့်ထက်ပိုပါသည်။ သရော်လှောင်ပြောင်သော အကြည့်လား။ ကားကို ဆင်းတွန်းလိုက်တာ ကျုပ်တို့ဗျ။ ကျုပ်တို့ကြောင့် ခင်ဗျားဣနြေ္ဒမပျက်တာဟု ဂုဏ်ဖော်လိုသည့်အကြည့်လား။ သို့မဟုတ် အချောင်ခိုသမားများဟု မကျေမနပ် စွပ်စွဲလိုသည့်အကြည့်လား။ ထိုခဏ၌ ကျွန်မသည် ယခင်ကလိုပင် မျက်နှာပူနွေးလာပြန်ကာ မလုံမလဲ ခံစားရပြန်သည်။ ကျွန်မ ကားပြတင်းဘက်သို့ မျက်နှာလွှဲပစ်လိုက်ရသည်။ အိုး… သူတို့တွေသာ ကားပေါ်မှာ ထိုင်စရာနေရာရခဲ့မယ်ဆိုရင် သူတို့လည်း ကားကို ဆင်းတွန်းမှာ မဟုတ်ပါဘူး။ ငါတို့လိုပဲ ထိုင်ကျန်နေခဲ့မှာပါပဲ။
စိတ်ကူးဖြင့် အနေအထားပြောင်းကာ မှန်းဆတွေးကြည့်ပြီးနောက် ပင့်သက်တစ်ချက် ရှိုက်မိသွားသည်။ ဤအဖြေသည် အမှန်ဖြစ်ချင် ဖြစ်မည် သို့မဟုတ် မှားချင်လည်းမှားနိုင်၏။
ဒါမျိုးက မှန်းဆကြည့်ရုံနှင့် အဖြေသိကောင်းသည့် ပုစ္ဆာမျိုးမဟုတ်ချေ။
ဂျူး
နိုင်ငံတကာနှင့်မြန်မာဝတ္ထုတိုများ ပေ့ဂ်ျကနေ ကူးယူပါတယ်။ ပေ့ဂ်ျကို ကျေးဇူးတင်ပါတယ်။
စလေ ငနော့
Comments
Post a Comment