နျူးဝေါတား 🖋 ဂျက်ကွမ်းခြံကုန်း

နျူးဝေါတား

**********

ဂျက်ကွမ်းခြံကုန်း

7Day Daily 

Wed, 2013-05-01 19:52

Issue No. No.5 Monday, April 29, 2013

(တစ်)

နျူးဝေါတား ဆိုတာကြီးကို ဂျက်ကွမ်းခြံကုန်း ပထမဦးဆုံးအကြိမ် စပြီးကြားခဲ့တာ လွန်ခဲ့တဲ့ လေးငါးနှစ်လောက်က ခင်ဗျ။ ဟုတ်ပါရဲ့ နျူးဝေါတားတဲ့။ အင်္ဂလိပ်လို စာလုံးပေါင်းတာကတော့ NEWater ပေါ့ဗျာ။ New က အသစ်၊ Water က ရေ၊ NEWater ဆိုတော့ ရေသစ်ပေါ့။ နာမည်လေးကတော့လှသား။

သည်နေရာမှာ ရေသစ်လို့ဆိုလိုက်တဲ့အတွက် သောက်ချင်စရာကလေးနေမှာပေါ့ ဘာညာနဲ့ စိတ်ကူးမယဉ်လိုက်ကြလေနဲ့ဦး။ ကျင်ငယ်ရေ ခင်ဗျ။ ဟုတ်တယ် ကျင်ငယ်ရေ။ ကိုယ်ပေါက်တဲ့ရှူရှူးကို ကိုယ့်ဘာသာ ပြန်သောက်လို့ရအောင် ပြန်လည်ပြုပြင်မွမ်းမံ ပေါင်းခံပြီးတော့ စစ်ယူထားတဲ့ရေ။ ဒါ့ကြောင့် နျူးဝေါတားတဲ့။ နျူးဝေါတားကို စပြီးသောက်ပြတာက မဟုတ်မှလွဲရော ပူတင်ခင်ဗျ။ ရုရှသမ္မတ ဗလာဒီမာပူတင်။ သောက်သုံးရေ ရှားပါးစပြုလာတဲ့ ရုရှားနိုင်ငံတော်မှာ ကျင်ငယ်ကို ရေသန့်အဖြစ် ပြန်လည်သန့်စင်တဲ့ စက်တွေဆောက်ပြီး သောက်ကြစမ်းတော့ဗျာရယ်လို့ မဲဆွယ်စည်းရုံးစဉ်ကာလမှာ သမ္မတကိုယ်တိုင်က “ဟောသမှာကြည့်  ကျွန်ုပ်သောက်ချလိုက်ပါ၏” ဆိုတာမျိုး လုပ်ပြလိုက်တော့ လူထုကလည်း အယုံအကြည်ရှိ သွားတော့တာပေါ့။

အဲ... အားရစရာအကောင်းဆုံးကတော့ စင်ကာပူဗျ။ စက်ရုံမှ ငါးရုံတောင်တဲ့။ ဒါ ထူးဆန်းတဲ့ သတင်းတော့မဟုတ်ပါဘူးဗျာ။ သတင်းစာတွေ၊ ဂျာနယ်တွေထဲမှာ တွေ့တွေ့နေရတဲ့ဥစ္စာ။ ရေချိုရှားတဲ့နိုင်ငံကိုးဗျ။ မလေးရှားကနေတောင် ရေချိုသွင်းရတဲ့နိုင်ငံမဟုတ်လား။ သည်တော့ သူ့နိုင်ငံသားများ ရေကို ၀၀လင်လင် သောက်သုံးနိုင်ကြစေရန်အလို့ငှာ ကျင်ငယ်ရေကနေ ရေအဖြစ် ပြန်လည်သန့်စင်ထုတ်လုပ်ပေးတဲ့ စက်ရုံကြီးငါးခု တည်ဆောက်ပြီးလို့ ဟော အခုဆို လုပ်ငန်းတောင် စပြီးလည်ပတ်နေပြီ။

မြန်မာအမျိုးကောင်းသားများကတော့ သည်လိုသတင်းတွေကြားပြီး ရယ်ချင်လည်းရယ်ကြမှာပေါ့။ ဆရာဇော်ဂျီရဲ့ ကဗျာထဲကလို “တို့ ရွာတို့မြေ၊ တို့ရွာမြေ၀ယ်၊ ရေချိုသောက်ရန်၊ မြစ်ချောင်းကန်နှင့် သီး နှံချိုပျား၊ များလည်းများ၏” လို့ ဆိုသလို မြစ်နဲ့ချောင်းနဲ့ ရေငန်နဲ့ကိုးခင်ဗျ။ အဲ... အခု မရယ်ကြနဲ့တော့။ ဂျက်ကွမ်းခြံကုန်းတို့လည်း ရယ်လို့မရတော့ဘူး။ ပြဿနာက ကိုယ့်ဆီမှာလည်း စပြီလေ။

(နှစ်)

သောက်ရေသုံးရေ ရှားလာတဲ့အကြောင်း သတင်းတွေ ခပ်စိပ်စိပ်ထွက်လာတာ လေးငါးနှစ်လောက်ရှိပြီဗျ။ အခု ၂၀၁၃ မှာတော့ အဆိုးဆုံးပေါ့။ အင်းလေးကန်ကြီးဟာ မနှစ်ကလိုပဲ ခန်းခြောက်၍ သွားပြန်ပါပြီတဲ့။ လားရှိုးမြို့က ရေကန် ၂၀ မှာ ၁၇ ကန်က ခန်းပြီဆိုလား။ ကျောက်မဲနဲ့နောင်ချိုမှာ ရေတွင်းတွေခန်း၊ ရေထွက်တွေရပ်။ ရှမ်းတောင်ဒေသတွေဖြစ်တဲ့ တောင်ကြီး၊ ဟဲဟိုး၊ ပွေးလှ၊ ပင်းတယ၊ ညောင်ရွှေမှာ ရေကန် တွေခန်းခြောက်။ ကျောက်ပန်းတောင်းနားက ရွာ ၂၀ ရေငတ်။ ချင်းပြည်နယ်ထဲက ဟားခါး၊ ဖလမ်း၊ မတူပီ၊ မင်းတပ်၊ တီးတိန်တို့မှာ ရေမရှိ။ သဖန်းဆိပ်ဆည်ကြီးက ရေမပေးနိုင်တော့လို့ ရွှေဘိုခရိုင်ထဲက လယ် ဧက သုံးသိန်းနှစ်သောင်းမှာ နှစ်သိန်းသုံးသောင်းကို ရေမပေးနိုင်တော့။ ရန်ကုန်တစ်ဘက်ကမ်းဒေသမှာ ရေငတ်။ စေတုတ္တရာမြို့နယ်ထဲမှာ သောက်စရာရေမရှိ။ သံလျင် ကျောက်တန်းဘက်မှာ ရေတွင်းတွေ တူးကြပြီ။ကဲ... ဘယ့်နှယ်ရှိပါစ။ “တို့ ရွာတို့မြေ၊ တို့ရွာမြေ၀ယ်၊ ရေချို သောက်ရန်၊ မြစ်၊ ချောင်း၊ ကန် နှင့် သီးနှံချိုပျား များလည်းများ၏” သေးရဲ့လား။

ဒါ့ကြောင့် ရှူရှူးကို သည်အတိုင်း အဟောသိကံ ပေါက်ချသင့် မပေါက်ချသင့်ဆိုတာကို ဂျက်ကွမ်းခြံကုန်းက ပြောဆိုလိုခြင်းပါ။

(သုံး)

ကမ္ဘာပေါ်မှာရှိတဲ့ ရေထုက ၁.၄ ဘီလီယံ ကုဗကီလိုမီတာတဲ့ဗျ။ အဲသည့်ထဲမှာ ရေချိုက ၃၅ သန်း ကုဗကီလိုမီတာမျှသာဆိုလား။ ဒါကြောင့် ရေချိုက ကမ္ဘာ့ရေထုရဲ့ ၂.၅ ရာခိုင်နှုန်းသာရှိတာတဲ့။ အဲသည် ရှိသမျှရေချိုကလေးရဲ့ ၇၀ ရာခိုင်နှုန်းကလည်း အာတိတ်ရေခဲပြင်တို့၊ အန္တာတိကရေခဲပြင်တို့၊ တောင်ထိပ်ကဆီးနှင်းတို့တွေဆီမှာမို့ လူတွေနဲ့ လက်လှမ်းမမီဘူးတဲ့။ သည်ကြားထဲမှာ သံဓာတ်များလို့၊ ခဲဓာတ် များလို့၊ အာဆင်းနစ်များလို့ဆိုတဲ့ ရေတွေကလည်း ရှိနေသေး။ ဒါ့ကြောင့် ဂျက်ကွမ်းခြံကုန်းတို့ ငယ်ငယ်က ပြောလေ့ရှိခဲ့တဲ့ ရေက တစ်ပိဿာရှိရင် သန့်တယ်ဆိုတာ ဘယ်မှာဟုတ်ပါတော့မလဲ။ ရေမြင်တိုင်းမှ သောက်မရတဲ့ဥစ္စာ။ သြော်... ဒါ့ကြောင့် ၂၀၂၅ မှာ ကမ္ဘာ့လူသား ၁.၈ ဘီလီယံတို့ ရေဒုက္ခအကြီးအကျယ်တွေ့မယ်ဆိုပြီး ဟောကိန်းထုတ်ထားတာကိုး။

(လေး)

ကိုင်း... အဲဒါတွေ ထားလိုက်ပေါ့။ ပြဿနာသိရင် အဖြေရှိတယ်လို့ဆိုသလို အခု အဖြေကရှိနေပြီ။ နျူးဝေါတား။ ကျင်ငယ်ရေကနေ ရေသန့်ပြန်လုပ်တဲ့နည်း။ ဂျက်ကွမ်းခြံကုန်းကတော့ ကြိုက်သဗျာ။ ရှူရှူးကို တွေ့ရာနေရာမှာ မပေါက်ရ။ ဒါဟာ ဖြုန်းတီးမှုတစ်ခု။ သွားလေရာမှာ ဘူးကလေးတွေ၊ ခွက်ကလေးတွေ ဆောင်ထား။ ပြီးရင် ကျင်ငယ်ရေ၀ယ်တဲ့ ဒိုင်တွေမှာ ပြန်သွင်း။ ၀င်ငွေလည်းရ ရေပြဿနာလည်း ရှင်းရာရောက်။ အဲ... တစ်ခုတော့ရှိသဗျ။ အနံ့။ ဟုတ်တယ်အနံ့။ ဘာနံ့မကြိုက် ညာနံ့မကြိုက်ဆိုတဲ့ လူတွေကလည်း ရှိသေးတယ်မဟုတ်လား။ နျူးဝေါတားတွေကို အမျိုးအစားခွဲထားမှ ဖြစ်မယ်ထင်တယ်။ တညင်းသီးနံ့သင်းသော နျူးဝေါတား၊ ဆူးပုပ်ရွက်နံ့သင်းသော နျူးဝေါတား၊ ဘီယာနံ့သင်းသော နျူးဝေါတားဆိုတာမျိုးပေါ့။

နောက်တစ်ခုက အရောင်။ ဟုတ်တယ်။ ဂျက်ကွမ်းခြံကုန်းကတော့ အင်နာဗွန်စီသောက်ထားတဲ့ ရှူရှူးအရောင်ကိုကြိုက်တယ်။ ၀ါဝါကလေး။ သောက်ကောင်းမယ်ဗျ။ ခင်ဗျားကရော ဘယ်လိုအနံ့ မျိုးကြိုက်သလဲမသိဘူး။ အရောင်ကရော၊ နှာခေါင်းမရှုံ့နဲ့ခင်ဗျ။ နျူးဝေါတားက မကြာခင် ဈေးကွက်ထဲကို 

ရောက်လာတော့မှာ။     ။

7Day Daily webpage ကနေ ကူးယူပါတယ်။ ဆဲဗင်းဒေးကို ကျေးဇူးတင်ပါတယ်။ ဆဲဗင်းဒေးက ကလောင်နာမည်ကို မှားရိုက်ထားတယ်ထင်လို့ ပြင်ထားပါတယ်။

စလေ ငနော့