ဆရာ နေဝင်းမြင့်နှင့်မောင်သာချို အတ္ထုပ္ပတ္တိများ
ဒီမနက် ပေ့ဂ်ျမှာ Message Box ကနေ အကူအညီတောင်းလာသူတဦးကို ဆရာ နေဝင်းမြင့်နဲ့ မောင်သာချိုတို့ရဲ့ အတ္ထုပ္ပတ္တိတွေ ရှာပြီး ပေးလိုက်ရပါတယ်။ စာရိုက် စာစီထားတဲ့ အားထုတ်မှုလေး အပိုဖြစ်မသွားရအောင် တင်လိုက်ပါရစေနော်။ အမျိုးတွေထဲက လိုအပ်သူရှိရင်လည်း ယူရတာပေါ့။
ဆရာနေဝင်းမြင့်၏ အတ္ထုပ္ပတ္တိ
**********************
နေဝင်းမြင့် (၁၉၅၂ - )
၁၉၅၂ - ခုနှစ်၊ ဖေဖော်ဝါရီလ(၆)ရက်နေ့တွင် မကွေးတိုင်း ပွင့်ဖြူမြို့နယ် ကုန်းဇောင်းကျေးရွာ၌ အဖ-ဦးဘရွှေ၊ အမိ-ဒေါ်သိန်းတို့က မွေးဖွားသည်။ အမည်ရင်းမှာ ဝင်းမြင့်(ခ)ခင်မောင်ဝင်းဖြစ်သည်။
၁၉၅၇ - ငယ်စဉ်က ကုန်းဇောင်းကျေးရွာ အလယ်တန်းကျောင်းတွင် ပဉ္စမတန်းအထိ ပညာသင်ကြားခဲ့သည်။
၁၉၆၂ - ထို့နောက် အင်းစိန်သို့ ပြောင်းရွှေ့လာခဲ့သည်။ အင်းစိန်မြို့-အစိုးရအထက်တန်းကျောင်း အမှတ်(၄)တွင် ဒဿမတန်းအထိ ပညာသင်ကြားခဲ့သည်။
၁၉၆၈ - အင်းစိန် ဒညင်းကုန်းအုတ်စက်ရုံအမှတ်(၁)တွင် ဝန်ထမ်းအဖြစ် အမှူထမ်းခဲ့သည်။ ပညာသည်(ထုတ်လုပ်ရေး)အဆင့်ထိ တာဝန်ထမ်းဆောင်ခဲ့သည်။
၁၉၈၅ - ဗျိုင်းမည်းနှင့်အခြားဝတ္ထုတိုများ စာမူဖြင့် စာပေဗိမာန် စာမူဆုဝတ္ထုတိုပေါင်းချုပ်(တတိယ)ဆုရရှိခဲ့သည်။
၁၉၈၇ - စာပေဗိမာန်မှ ဗျိုင်းမည်းနှင့်အခြားဝတ္ထုတိုများစာအုပ်ထွက်ခဲ့သည်။
၁၉၉၂ - ဩဂုတ်လတွင်-မဂ္ဂဇင်းများတွင် ရေးသားဖြစ်သည့် ဝတ္ထုတိုများကို စုစည်းလျက် အားမာန်သစ်စာပေမှ ဆယ့် နှစ်ကြိုးဝတ္ထုတိုများ စာအုပ်ထွက်ခဲ့သည်။ (ယင်းစာအုပ်ဖြင့်-အမျိုးသားစာပေ ဝတ္ထုတိုပေါင်းချုပ်ဆုရရှိခဲ့သည်။)။
၁၉၉၈ - ပြင်သစ်နိုင်ငံ၊ ပါရီမြို့သို့ လေ့လာရေးခရီးသွားရောက်ခဲ့သည်။ အောင်မောင်းအမည်ဖြင့် လှသောဘဝကို ထုဆစ်သူများထွက်။ အိန္ဒိယဝတ္ထုများ ဘာသာပြန်ထွက်ခဲ့သည်။
၂၀၀၀ - မန္တလေးမြို့မှ လူရွှင်တော်ကြီးများနှင့် တွေ့ဆုံမေးမြန်း မှတ်တမ်းတင်ထားသော ပုလ္လင်အငြိမ့် ကုတင်အငြိမ့် စာအုပ်ထွက်ခဲ့။ နိုဝင်ဘာလတွင် ပုဇဉ်းရင်ကွဲဝတ္ထုတိုများ(ဒု)အကြိမ်ထွက်ခဲ့။ ဆယ့်နှစ်ကြိုးဝတ္ထု တိုများ တတိယအကြိမ်ပြန်ထွက်။ (၁၉၉၀-၁၉၉၉)ထိရေးသားခဲ့သည့် ဝတ္ထုတိုများမှ ရွေးချယ်လျက်-ဥတ္တရလမင်း စာပေမှ နေဝင်းမြင့် လက်ရွေးစင်ဝတ္ထုတိုများထွက်ခဲ့။ ဇူလိုင်လတွင် ပြင်သစ်နိုင်ငံ-ပါရီမြို့သို့ သွားရောက်ခဲ့သည့် အတွေ့အကြုံများအား ပါရီနွေဦး သရုပ်လွန်အလင်းနှင့် ရာစုသစ်ပင်၏ရုပ်ကြွင်းများ အမည်ဖြင့် ခရီးသွားမှတ် တမ်းစာအုပ်ထွက်ခဲ့သည်။
၂၀၀၂ - မဂ္ဂဇင်းများတွင် ရေးဖြစ်ခဲ့သည့် အက်ဆေးများကို စုစည်းလျက် မြို့ပြပိုးမွှားများ စာအုပ်ထွက်ခဲ့သည်။
၂၀၀၄ - အိုင်ဒီယာ အက်ဆေးများ စာအုပ်ထွက်ခဲ့။ သစ်သီးလှေ-ဘာသာပြန်ပုံပြင်ထွက်။ ရသအတွေး၊ ရသ အက်ဆေး(ဘာသာပြန်) စာအုပ်ထွက်သည်။
၂၀၀၆ - တောင်တန်းများကိုပင် ပေါ့ပါးစေသည့် ကောင်းကင် အမည်ရှိ လူငယ်များအတွက် စာစုစာအုပ် ထွက်ခဲ့။ ဆရာနှင့် အခြားဘာသာပြန်ဝတ္ထုတိုများ ထွက်သည်။
၂၀၀၇ - အိမ်ကလေး-၁၆-လုံးအက်ဆေးစုစည်းမှု စာအုပ်ထွက်သည်။ ထိုစာအုပ်ဖြင့် ၂ဝဝရ ခုနှစ်အတွက် အမျိုးသားစာပေဆု(ဝတ္ထုတိုပေါင်းချုပ်) ရရှိသည်။
နေဝင်းမြင့်သည့် ယခုအခါ ဇနီး- စာရေးဆရာမ ခင်ခင်ထူးနှင့်အတူ မန္တလေးမြို့တွင်နေထိုင်ရင်း စာပေများ ရေးသားပြုစုနေသည်။ ကလောင်အမည်ကွဲများမှာ ဝင်းဖွေး၊ အောင်မောင်း စသည်တို့ ဖြစ်သည်။ နေဝင်မြင့် ဖုန်းနံပါတ်မှာ ၀၉၂၀၁၃၂၆၆ ဖြစ်သည်။
ထင်ရှားသောစာအုပ်အချို့
ဗျိုင်းမည်း
ဆယ့်နှစ်ကြိုးဝတ္ထုတိုများ
ပလ္လင်အငြိမ့် ကုတင်အငြိမ့်
မြို့ပြပိုးမွှားများ
အိုင်ဒီယာအက်ဆေးများ
ပါရီနွေဦး၊ သရုပ်လွန်အလင်းနှင့် ရာစုသစ်ပင်၏ ရုပ်ကြွင်းများ(ခရီးသွားမှတ်တမ်း)
လက်ရွေးစင် ဝတ္ထုတိုများ
ပုစဉ်းရင်ကွဲ ဝတ္ထုတိုများ
လှသောဘဝကို ထုဆစ်သူများ(အောင်မောင်း)
အိမ်ကလေးဆယ့်ခြောက်လုံး
ကြည်းတော၌မိုးခေါ်ခြင်း (ဂျူး၊ နေဝင်းမြင့်)
ခရီးနိုင်ငံရေး
အိုင်ဒီယာအက်ဆေးများ
Wikipedia ကနေ ကူးယူပြီး မူရင်းယူနီကုဒ်ဖောင့်တွေကို ဇော်ဂျီအဖြစ် ပြောင်းထားပါတယ်။ ဝီကီကို ကျေးဇူးတင်ပါတယ်။
စလေ ငနော့ (ကျော်ဇင်လတ်)
______________________________
ဆရာမောင်သာချို၏ အတ္ထုပ္ပတ္တိ
*********************
မောင်သာချို (၁၉၅၈ - )
၁၉၅၈ ခုနှစ်၊ မတ်လ ၁၁ ရက်နေ့တွင် ရန်ကုန်တိုင်း၊ ကွမ်းခြံကုန်းမြို့၌ အဖ ကုန်သည် ဦးဝင်းသိန်း + အမိ ဒေါ်တင်တို့မှ မွေးဖွားသည်။ အမည်ရင်း ညွန့်သောင်း။ မွေးချင်းသုံးယောက်အနက် အကြီးဆုံးဖြစ်သည်။ ငယ်စဉ်က ကွမ်းခြံကုန်းမြို့၊ သုံးခွရွာ မူလတန်းကျောင်းတွင် သူငယ်တန်းမှ စတုတ္ထတန်းအထိလည်းကောင်း၊ အ.ထ.က (၁) ကွမ်းခြံကုန်းတွင် ပဉ္စမတန်းမှ ဆဋ္ဌမတန်းအထိလည်းကောင်း၊ ရန်ကုန်မြို့ အ.လ.က (၁) မြောက်ဥက္ကလာပတွင် သတ္တမတန်းမှ အဋ္ဌမတန်းအထိလည်းကောင်း၊ အ.ထ.က (၁) မြောက်ဥက္ကလာပတွင် နဝမတန်းမှ တက္ကသိုလ်ဝင်တန်းအထိလည်းကောင်း ပညာသင်ကြားခဲ့သည်။ ၁၉၇၇ ခုနှစ်တွင် ရန်ကုန်ဒေသကောလိပ်နှင့် ရန်ကုန်ဝိဇ္ဇာသိပ္ပံတက္ကသိုလ်၌ မြန်မာစာ အဓိကဘာသာဖြင့် ဆက်လက်ပညာသင်ကြား၍ B.A (မြန်မာစာ) ဘွဲ့ ရရှိသည်။ ရန်ကုန်ဝိဇ္ဇာသိပ္ပံတက္ကသိုလ်တွင် မြန်မာစာဌာန နည်းပြဆရာအဖြစ် တာဝန်ထမ်းဆောင်ရင်း လုပ်သားများကောလိပ်၊ နိုင်ငံခြားဘာသာတက္ကသိုလ်၊ မိတ္ထီလာတက္ကသိုလ်၊ ဟင်္သာတတက္ကသိုလ်များတွင်လည်း တာဝန်ထမ်းဆောင်ခဲ့သည်။ ယခုအခါ ပညာရေးတက္ကသိုလ်တွင် ကထိကအဖြစ် တာဝန်ထမ်းဆောင်လျက် ရှိသည်။
မောင်သာချိုသည် ၁၉၇၄ ခုနှစ်၊ ၉ တန်းကျောင်းသားဘဝမှာပင် သောင်းပြောင်းထွေလာ မဂ္ဂဇင်းတွင် 'ခေတ်သစ်မေတ္တာ' ကဗျာဖြင့် စာပေလောကသို့ စတင် ရောက်ရှိလာပြီး ၁၉၇၇-၇၈ ခုနှစ်မှစ၍ ငွေတာရီ၊ ရှုမဝ၊ မိုးဝေမဂ္ဂဇင်းများတွင် ဆောင်းပါး၊ အက်ဆေး၊ ဝတ္ထုတို(ချစ်ကိုယ်တွေ့)၊ ကဗျာများ ဆက်လက်ရေးသားသည်။ ၁၉၈၈ ခုနှစ်တွင် 'အိပ်မက်ဖူး' မဂ္ဂဇင်းအယ်ဒီတာအဖြစ် ဆောင်ရွက်လျက် ယမုံ၊ နေစိမ့်၊ ခင်လွန်းတို့နှင့်အတူ ရသစုံမဂ္ဂဇင်းတစ်စောင် ထုတ်ဝေခဲ့ခြင်း ဖြစ်သည်။ နောက် အယ်ဒီတာဝင်းငြိမ်း၏ ရုပ်ရှင်အမြုတေမဂ္ဂဇင်းတွင် 'ဂျက်ကွမ်းခြံကုန်း' ကလောင်ခွဲဖြင့် ဟာသနှင့် သရော်စာဆောင်းပါးများ စတင်ရေးသားသည်။ မင်္ဂလာမဂ္ဂဇင်း၊ မဟေသီမဂ္ဂဇင်း၊ ရုပ်ရှင်တေးကဗျာမဂ္ဂဇင်းများတွင်လည်း ဆက်လက်ရေးသားခဲ့သည်။ ၁၉၉၉ တွင် 'သမီးဖတ်ဖို့' ဆောင်းပါးများဖြင့် ဖြူးမိတ်ဆွေများ စာပေဆုကိုလည်းကောင်း၊ ၁၉၉၇ ခုနှစ်တွင် 'ဖျတ်ခနဲတွေ့ရသည့် ကျွန်တော်တို့ရှေ့က ကြယ်တာရာများ' ဆောင်းပါးဖြင့် မန္တလေး စာဖတ်သူအကြိုက် စာပေဆုကိုလည်းကောင်း၊ ၂၀၀၀ ခုနှစ်တွင် 'သမီးဖတ်ဖို့ ဆောင်းပါးများ' စာအုပ်ဖြင့် တောင်ငူမော်ကွန်းသစ်စာပေဆုကိုလည်းကောင်း၊ ၂၀၀၄ ခုနှစ်တွင် 'လင်္ကာရလမ်း' စာအုပ်ဖြင့် ထန်းရိပ်ညို စာပေဆုကိုလည်းကောင်း၊ ၂၀၀၉ ခုနှစ်တွင် 'သမီးဖတ်ဖို့ဆောင်းပါးပေါင်းချုပ်' စာအုပ်ဖြင့် ထွန်းဖောင်ဒေးရှင်းစာပေဆုကိုလည်းကောင်း အသီးသီး ချီးမြှင့်ခံရသည်။ ယခုအခါ မန္တလေး FM မှ သမီးဖတ်ဖို့ ဆောင်းပါးများနှင့် ချယ်ရီ FM ရှိ 'ဂျက်ကွမ်းခြံကုန်း' ၏ သရော်စာများကို အသံလွှင့်ခဲ့သည်။
ထုတ်ဝေပြီးသော စာအုပ်များမှာ 'သမီးဖတ်ဖို့၊ ပင်လယ်ဝသို့ လှေကလေးနဲ့ ထွက်ခဲ့၊ အိပ်မက်များ အနားမလာရ၊ လင်္ကာရလမ်း၊ နှလုံးသားရှုမျှော်ခင်းများ၊ ပိုးပင်လယ်ပေါ် ကတ္တီပါရွက်လွှင့်၊ ဖျတ်ခနဲတွေ့ရသော ကျွန်တော်တို့ရှေ့က ကြယ်တာရာများ၊ စိမ်းလန်းသောမိသားစုများ၊ ကျေးဂျူးကမ္ဘာဆိုင်၊ ဥတ္တရလမင်းနှင့် မြောက်ဘက်တောင်ကုန်းပေါ်က မှော်ရုံလမ်းများ' အစရှိသော စာအုပ်များနှင့် ဂျက်ကွမ်းခြံကုန်း ကလောင်ခွဲဖြင့် 'သပွတ်အူကျေးရွာမှ မမြင်ရသော ကံတရားများ၊ တို့တော့မယ်တဲ့ ဆိတ်တော့မယ်၊ ဂျာနယ်ထဲက ဂျက်၊ ရယ်လို့သာ မောကြပေတော့၊ လွမ်းလို့ရယ်တဲ့ မကုန်နိုင်တယ်၊ တုတ်ထိုးအိုးပေါက်၊ ဆင်တော်မှာ ခလောက်ကို ဆွဲပါလို့၊ မပြောကောင်း မဆိုကောင်း၊ လူကြားလို့ မကောင်းဘူး၊ ဂျက် ၅၀ စာအုပ်' များ ရေးသားထုတ်ဝေခဲ့ပါသည်။
မောင်သာချိုသည် မဂ္ဂဇင်းများအပြင် ဂျာနယ်များ (7 Day ဂျာနယ်၊ ပေါ်ပြူလာဂျာနယ်၊ True ဂျာနယ်၊ Modern Time ဂျာနယ်များ) တွင်လည်း လူမှုရေးဆိုင်ရာ၊ ရုပ်ပုံလွှာများဆိုင်ရာ၊ စာပေအနုပညာရေးဆိုင်ရာ ဆောင်းပါးများနှင့်အတူ ကဗျာ၊ အက်ဆေး၊ ဝတ္ထုတိုများလည်း ရေးသားလျက်ရှိပြီး ဇနီး ဒေါ်ခင်သက်ဆွေ၊ သမီး မေတာရာဖူး၊ သား ခွန်တေဇတို့နှင့်အတူ မြောက်ဥက္ကလာပမြို့နယ်၊ (ဂ) ရပ်ကွက်၊ ဥက္ကာ ၆ လမ်း၊ အမှတ် ၁၇၃ နေအိမ်တွင် နေထိုင်လျက် ရှိသည်။
(ဒီ ဆရာ့ရဲ့ အတ္ထုပ္ပတ္တိကို ၂၀၁၆ ဒီဇင်ဘာလမှာ ဒုတိယအကြိမ် ထုတ်ဝေတဲ့ ဆရာ့ရဲ့ 'အနာဂတ်ဝါကျများ' စာအုပ်ထဲကနေ စာရိုက် ကူးယူဖော်ပြခြင်း ဖြစ်ပါတယ်။ အချိန်ကာလအရ အချက်အလက်တချို့ updated မဖြစ်ခဲ့ရင် နားလည်ပေးကြစေလိုပါတယ်။ ကျနော့်ဆီမှာ ရှိသမျှ ဆရာ့ရဲ့ စာအုပ်တွေထဲမှာ ဒီတအုပ်ပဲ ဆရာ့အကြောင်း ဖော်ပြထားတာ တွေ့ရလို့ ဖြစ်ပါတယ်။)
စလေ ငနော့ (ကျော်ဇင်လတ်)
Comments
Post a Comment