ချိုတကူးနှင့် ဂုဏ်ရည်မတူ 🖋 အောင်သင်း

ချိုတကူးနှင့် ဂုဏ်ရည်မတူ 

*********************

အောင်သင်း

(လှလိုက်တာနော်နှင့် ရသစာတမ်းငယ်များ စာအုပ်မှ။)

အတုနှင့် အစစ်၊ အစစ်ကို ပို၍ မြတ်နိုးသင့်ကြပေသသည်။ သို့သော်-

ကျွန်တော်တို့မြို့တွင် ‘ချိုတကူး’ ဟုခေါ်ကြသော ကုလားလေးတစ်ယောက်ရှိသည်။ သူ့ဘ၀၏ တစ်ပိုင်းတစ်စကို တင်ပြချင်ပါသည်။ ဒုတိယကမ္ဘာစစ်ကြီးဖြစ်ပွားစဉ်အခါက ချိုတကူးသည် ဆယ့်သုံးနှစ်သားမျှသာ ရှိသေးသည်။ သူ၏ဖခင်သည် ဆံပင်ညှပ်သောအလုပ်ကို လုပ်၍ သူ့မိသားစုရပ်တည်အောင် ဆောင်ရွက်သူဖြစ်သည်။ သူတို့ မိသားစုတွင် သူ့ဖခင်၊ သူ့မိခင်အပြင် အစ်ကိုတစ်ယောက်၊ အစ်မတစ်ယောက်နှင့် သူပါဆိုလျှင် မိသားစု၌ ငါးယောက်ရှိသည်။ ချိုတကူးတို့သည် ဟိန္ဒူလူမျိုးများဖြစ်ကြသည်။

စစ်ကြီးဖြစ်၍ အိန္ဒိယလူမျိုးများ အိန္ဒိယသို့ ပြန်သောအခါ သူတို့မိသားစုသည်လည်း ကယောင်ကတမ်းနှင့် အိန္ဒိယသို့ ပြန်ှကြရန် ဧရာဝတီမြစ်ကြောင်းမှ သင်္ဘောဖြင့် ဆန်တက်လိုက်ပါသွားကြသည်။ သူတို့ခရီးစဉ်မှာ သင်္ဘောဖြင့်ဆန်တက်၍ မြန်မာပြည် အထက်ပိုင်း ရောက်မှ အိန္ဒိယပြည်ဘက်သို့ ကုန်းကြောင်းကူးကြရန်ဖြစ်သည်။

သူတို့ လိုက်ပါသွားသော သင်္ဘောသည် နောက်ဆုံးသင်္ဘောဖြစ်၍ စစ်မိန့်လွှမ်းမိုးသော သင်္ဘောလည်းဖြစ်သည်။ အထက်မြန်မာပြည် မြို့ကြီးတစ်မြို့အရောက်တွင် သင်္ဘော ခေတ္တဆိုက်ကပ် နားနေသည်။ ချိုတကူး၊ သူ့ဖခင်နှင့် သူ့အစ်ကို၊ သားအဖသုံးယောက်သည် မြို့ပေါ်သို့ခေတ္တ တက်ရောက်လည်ပတ်ပြီးလျှင် လိုအပ်သမျှ စားစရာကလေးများကို ၀ယ်ခြမ်းကြသည်။ သင်္ဘောဥသြသံ ကြားရ၍ သင်္ဘောဆိပ်သို့ ဒရောသောပါး ပြန်ပြေးလာကြသည်။ သူတို့ကမ်းနဖူးရောက်သော အခါ သင်္ဘောရေလယ်သို့ ရောက်နေပြီ။ သင်္ဘောသည် စစ်မိန့်ဖြင့် အရေးတကြီး ထွက်ခွာသွားရလေပြီ။ သင်္ဘောပေါ်တွင် သမီးနှင့် မိခင်၊ ကမ်းပေါ်တွင် သားအဖသုံးယောက်။ ချိုတကူးတို့သည် ရုတ်တရက် အခြေအနေကို နားမလည်ဘိသကဲ့သို့ ကြောင်နေကြသည်။ ဤသို့ဖြင့် သမီးနှင့် မိခင်တို့သည် အိန္ဒိယသို့ပါသွား၍ သားအဖသုံးယောက်သည် မြန်မာပြည်တွင် အူလည်လည် ကျန်ရစ်ရရှာသည်။ တစ်ဖက်နှင့် တစ်ဖက် စစ်မီးလျှံအတွင်း မည်သို့ဖြစ်ကြလေမည်ကို မတွေးဝံ့အောင်ပင် ဖြစ်ကြရသည်။

သို့သော်လည်း မတတ်နိုင်ကြလေပြီ။ သားအဖသုံးယောက်သည် စိတ်ပျက်လက်ပျက်နှင့် မြေလတ်ပိုင်း မူလနေထိုင်ရာ မြို့ကလေးဆီသို့ ပြန်လာကြသည်။ လမ်းတစ်လျှောက်လုံးတွင် အိန္ဒိယ တိုင်းရင်းသား စစ်တပ်များရှိကြသေး၍ တစ်တပ်ဝင်၊ တစ်တပ်ထွက်နှင့် ဆံပင်ညှပ်ကာ အသက်ဆက်ခဲ့ ကြရသည်။ ဤသို့ဖြင့် မြို့ကလေးသို့ပြန်လည် ဆိုက်ရောက်လာကြသည်။

ဂျပန်ခေတ်တွင်လည်း ဆံပင်ညှပ်၍ပင် အသက်မွေးကြသည်။  သို့သော် ၀မ်းရောဂါတစ်ချီ ဖြစ်လိုက်ရာ ချိုတကူး၏ ဖခင်နှင့် အစ်ကိုတို့သည် ရှေ့ဆင့် နောက်ဆင့် ကိစ္စချောသွားကြပြန်သည်။ ယခုကား ချိုတကူးတစ်ယောက်တည်း။

ချိုတကူးသည် ကြာရှည်စိတ်ညစ်တတ်သူမဟုတ်။ ဖြစ်သမျှ ကြုံသမျှတို့ကို ထမင်းစားသကဲ့သို့၊ ရေသောက်သကဲ့သို့ ရယ်ကာမောကာ ပြန်ပြောတတ်သည်။ ဧရာမ လောကဓံကြီးကို ကြုံရသည်ဟုလည်း သူမသိ။ မသိသောကြောင့်သူမတွေး။ မတွေးသောကြောင့် သူမဆင်ခြင်။ မဆင်ခြင်သောကြောင့် လောကဓံကို သူမမြင်။ ထို့ကြောင့် ဘုရားပွဲ ပျော်ပွဲ ရွှင်ပွဲ လုပ်လျှင် ဘယ်သူကမှ သူ့ကို မဖိတ်ကြားရဘဲ သူရောက်လာတတ်သည်။ ဘယ်နေရာမှာပင် သုံးသုံး ကိုချိုတကူးက မငြင်း။ မျောက်လုပ်၍လည်း ကသည်။ မြေလျှောက်မင်းသား လုပ်၍လည်းကသည်။ ပျော်ပျော်ပဲ။

ထို့ကြောင့် ပင်လားမသိ။ အိမ်နီးချင်းများသည် သူ့အဖြစ်များကို ကြားရသောအခါ သနားတော့ သနားကြပါ၏။ သို့သော်လည်း စုတ်သပ်ရုံမျှသာ ဖြစ်သည်။ မျက်ရည်စို့လောက်အောင်ကား ထိခိုက်ခြင်း မရှိကြ။

သည်ကိစ္စကို ထားဦးတော့။

စာရေးဆရာ ဒါရိုက်တာ‘သုခ’ ၏ ‘ဂုဏ်ရည်မတူ’ ဇာတ်ကားပြသောအခါ ရုပ်ရှင်ရုံတွင် ချိုတကူးနှင့် အမှတ်မထင် ဆုံတွေ့ရသည်။ ချိုတကူးနှင့် သူ့အိမ်နီးချင်း မိန်းမကြီးလေးငါးယောက်နှင့် အတူ တစ်ခုံတည်း ထိုင်မိလျက်သား ဖြစ်နေသည်။ ရုပ်ရှင်ဇာတ်လမ်းနောက်ပိုင်း ‘မေသစ်အပူခန်း’ သို့ ရောက်သောအခါ မိန်းမကြီးများသည် ‘မေသစ်’ ကို သနားလွန်း၍ မျက်ရည်မဆည်နိုင်အောင် ဖြစ်ကြရသည်။ ချိုတကူးလည်း မျက်ရည်ဝေ့နေသည်ဟု ထင်ပါသည်။ ကျွန်တော်လည်း မျက်ရည်မကျစေကာမူ နှာပိတ်ချင်သလိုလို ဖြစ်လာပါသည်။

ရုပ်ရှင်ပြီး၍ ထွက်လာကြသောအခါ အမျိုးသမီးကြီးများမှာ မျက်ခွံနီနေသည်။ ချိုတကူးလည်း ‘ကောင်းလိုက်တာကွာ၊ ငါဖြင့် မျက်ရည်တောင် ကျမိတယ်’ ဟု ရယ်မော၍ပြောပါသည်။

ဖြစ်ရာဘ၀တွင် ပျော်ပျော်ကြီးနေတတ်၍ ကိုယ့်ကိုယ်ကိုပင် သနားရမှန်းမသိသော ကိုချိုတကူးက မေသစ်ကို သနားနေပါသည်။ အဒေါ်ကြီးများကလည်း ချိုတကူး၏ ဖြစ်တော်ပေါင်းအတွက် မျက်ရည်စမ်းစမ်းမျှပင် မဖြစ်ခဲ့ဘူးပါလျက် မေသစ်ကျမှ မျက်ရည်အိုင်ကြရသည်။

ချိုတကူး၏အဖြစ်သည် တကယ်ဖြစ်၊ အဟုတ်ဖြစ်၊ စစ်စစ်စစ်စစ်ဖြစ်နေသော အဖြစ်စစ်ဖြစ်သည်။ မေသစ်၏အဖြစ်သည် ပိတ်ကားပေါ်က ဘ၀ဖြစ်စဉ်မျှသာ ဖြစ်သည်။ ချိုတကူး၏ ရာဇ၀င်သည် အစစ်။ မေသစ်၏ရာဇ၀င်သည် အတု။ သူတို့သည် အစစ်ထက် အတုကို ပို၍ ကရုဏာသက်နေကြသည်။

ကျွန်တော့်စိတ်ထဲတွင် မကျေမနပ်ဖြစ်နေမိသည်။ ကျွန်တော့်ကိုယ်ကိုလည်း ကျွန်တော် မကျေနပ်ပါ။ ကျွန်တော်လည်း သူတို့နှင်နှင်သာဖြစ်သည်။ အတုကို မြတ်နိုးနေသည်။

အစစ်နှင့် အတု၊ အတုနှင့် အစစ် ပြဿနာသည် ကျွန်တော်၏ရင်တွင် ပို၍ရှုပ်ထွေးလာပါသည်။ အစစ်နှင့် အတုကို နှိုင်းယှဉ်၍ ကြည့်ချင်တတ်လာပါသည်။ သတိပြုလာပါသည်။

ပန်းချီစာစောင်တစ်ခုကို တောင်လှန် မြောက်လှန် ကြည့်နေရင်း ပန်းချီကားတစ်ချပ်ကို တွေ့သည်။ ဒေါ်လာထောင်ချီ၍ပေးဝယ် သွားသော ပန်းချီကားတစ်ချပ်ဖြစ်သည်။ စပျစ်သီးတစ်ခိုင်၊ ပန်းသီးတစ်စိတ်၊ ဓားတစ်ချောင်း၊ ဖန်ချိုင့်တစ်ခု၊ နောက်ခံကန့်လန့်ကာ တစ်ပိုင်းတစ်စဖြစ်သည်။ ဤပစ္စည်းများကို စားသောက်ရန် ဈေးထဲသွားဝယ်လျှင် ငွေ တစ်ဆယ်ဖိုးထက် ကုန်မည်မဟုတ်။ သို့သော် အစစ်ကို မမက်မော၊ အတုမျှသာဖြစ်သော ပန်းချီကားကို ဒေါ်လာထောင်ချီ၍ ပေးဝယ်ကြသည်။ အတုကို အစစ်ထက် တန်ဖိုးထားကြသည်။

ကျွန်တော့်စိတ်ထဲတွင် အစစ်ထက် အတုကို မြတ်နိုးလေးစားကြသော လောကကို ကျွန်တော် မကျေနပ်ချင်ပါ။ အစစ်ကိုသာ တန်ဖိုးထားစေချင်သည်။ သို့သော် ကျွန်တော် ကိုယ်တိုင်က အတုကို သြဘာပေးနေသည်။ မေသစ်ကို ပိုသနား၍ ပန်းချီကားကို ပိုချစ်နေသည်။

ဤသို့တွေးရင်း ချိုတကူး၏ အဖြစ်အပျက်ကို ဆရာသုခလို ဒါရိုက်တာမျိုးနှင့် ရုပ်ရှင်ရိုက်ရသော်ဟု တွေးမိပါသည်။ ချိုတကူးကိုယ်တိုင် တစ်ကိုယ်လုံး မျက်ရည်ဖြစ်ပြီး မျောသွားမလားမသိပါ။

ကျွန်တော်၏စိတ်တွင် လျှပ်ပြက်သကဲ့သို့ တစ်ချက် ၀င်းကနဲ ဖြစ်သွားပါသည်။ အလှမယ်၏ မျက်နှာကို လွှမ်းထားသော ဇာပ၀ါပြုတ်ကျသည့်အခိုက် အလှမယ်၏မျက်နှာကို ခေတ္တမျှ မြင်လိုက်ရ သကဲ့သို့ ‘အနုပညာ’ ၏ မျက်နှာကို ရိပ်ခနဲ မြင်လိုက်ရသလိုလို ထင်မိပါသည်။

အောင်သင်း

ဆရာအောင်သင်း Sayaraungthin Wordpress ဝက်ဘ်ဆိုဒ်ကနေ ကူးယူပါတယ်။ ဝက်ဘ်ဆိုဒ်ကို ကျေးဇူးတင်ပါတယ်။

စလေ ငနော့